پاکستان تحریک انصاف کے بانی چیئرمین اور سابق وزیر اعظم عمران خان نے ملک میں سیاسی امن قائم کرنے کے خاطر فوج کے ساتھ مذاکرات پر آمادگی کا اظہار کرتے ہوئے بات چیت کیلئے نمائندہ مقرر کرنے کا کہا ہے، انہوں نے پاکستان کی بری فوج کی مقتدرہ کیساتھ مذاکرات کیلئے اپنی آمادگی کا اظہار کیا ہے، اڈیالہ جیل راولپنڈی میں اپنے اور اہلیہ بشری بی بی کے خلاف ریفرنس کی سماعت کے موقع پر صحافیوں سے غیر رسمی گفتگو کرتے ہوئے کہا کہ سقوط ڈھاکا کے پیچھے جنرل یحییٰ خان کا ہاتھ تھا، صحافی نے سابق وزیر اعظم سے سوال کیا کہ آپ فوج پر الزامات لگاتے ہیں اور انہی سے مذاکرات بھی چاہتے ہیں، آپ ظلم کریں گے اگر فوج پر تنقید بند کر دیں گے، سابق وزیر اعظم نے کہا کہ ہمیں یہ نہ سکھائیں کہ فوج نے کبھی کوئی غلطی نہیں کی، ذوالفقار علی بھٹو کی سزا کے پیچھے جنرل ضیا تھا، اس موقع پر ایک صحافی نے سوال عمران خان سے سوال کیا آپ کی حالیہ باتوں سے لگ رہا ہے کہ آپ فوج سے معاملات ٹھیک کرنا چاہتے ہیں، جس پر عمران خان نے کہا کہ ہم نے فوج پر کبھی الزامات نہیں لگائے تنقید کی ہے، انہوں نے کہا کہ گھر میں کوئی بگڑا ہوا بچہ ہو تو اس پر تنقید کی جاتی ہے، فوج پر تنقید اس وجہ سے کی تھی کیونکہ تنقید جمہوریت کا حسن ہے۔
بانی پی ٹی آئی عمران خان نے کہا کہ ایس آئی ایف سی کیا ہے، وزیر داخلہ محسن نقوی کون ہے، غیر اعلانیہ مارشل لا نافذ ہے، محسن نقوی انہی کا تو نمائندہ ہے، وہ یہاں انہی کے ذریعے پہنچا، صحافی نے پوچھا کہ ایسی باتیں سامنے آرہی ہیں کہ آپ اور آپ کی پارٹی کے کچھ لوگ محمود خان اچکزئی پر بھروسہ نہیں کرتے ہیں جس پر عمران خان نے کہا کہ محمود اچکزئی پر پورا بھروسہ ہے انہیں مذاکرات کا مینڈیٹ دیا، دوسری طرف سے کوئی نام سامنے آتا تو ہم بات کرتے مذاکرات کے لئے تیار ہیں، فوج اپنا نمائندہ مقرر کرے، صحافی نے سوال کیا کہ آپ کہتے ہیں کہ محسن نقوی ان کا نمائندہ ہے، اگر ادھر سے محسن نقوی کو مذاکرات کا اختیار دیا جائے تو آپ مذاکرات کریں گے، اس پر سابق وزیر اعظم نے کہا کہ محسن نقوی سے کبھی بات نہیں کروں گا، اس نے انسپکٹر جنرل (آئی جی) پنجاب سے مل کر ہمارے لوگوں پر ظلم کیا، یہ ظل شاہ کی موت کا ذمہ دار ہے، یہ بیرون ملک کہیں نہیں جا سکے گا، بیرون ملک عوام تشدد سے نفرت کرتے ہیں، بانی پی ٹی آئی نے وزیر اعلیٰ پنجاب پر سخت تنقید کرتے ہوئے کہا کہ مریم نواز فاشسٹ ہے، وہ باپ کے چوری کے پیسوں پر ایسے پلی ہے جیسے شہزادی ہو، مریم نواز نے آئی جی پنجاب کو اسی لئے رکھا ہوا ہے کہ اس نے پی ٹی آئی پر ظلم کیا ہے۔