اسرائیل پر ایرانی حملے کے بعد اردن نے ہنگامی حالت کا اعلان کردیا ہے، سرکاری نیوز ایجنسی کے مطابق ہفتے کی سہ پہر اردن نے اعلان کیا کہ اپنے اُس نے اپنی فضائی حدود ہر قسم کے طیاروں کیلئے بند کردی ہے، جس میں ٹرانزٹ طیارے بھی شامل ہیں، اردن کی حکومت نے عوام سے پُر سکون رہنے کا مطالبہ کرتے ہوئے کہا ہے کہ حکومت سرکاری ذرائع ابلاغ کے ذریعے عوام کو تازہ ترین صورتحال سے آگاہ کرتی رہے گی، اردن کے سول ایوی ایشن ریگولیٹری کمیشن کے چیئرمین ہیتھم میستو نے سرکاری نیوز ایجنسی کو بتایا کہ اردن کی فضائی ٹریفک میں مداخلت نے اردن کے جی پی ایس سسٹم کو متاثر کیا جس نے علاقے میں طیاروں کو متبادل نیویگیشن سسٹم استعمال کرنے پر مجبور کیا، ایران کی سپاہ پاسداران انقلاب اسلامی نے اعلان کیا ہے کہ اُس نے یکم اپریل کو شام کے دارالحکومت دمشق میں اسلامی جمہوریہ کے سفارتی احاطے پر اسرائیلی حکومت کے دہشت گردانہ حملے کے جواب میں صیہونیوں کے زیر قبضہ علاقوں پر بڑے پیمانے پر جوابی حملے کیے ہیں، جس میں ڈرونز اور کروز میزائل استعمال کئے جارہے ہیں، اسرائیل نے ملک بھر میں ایمر جنسی نافذ کرکے عوام کو زیرزمین پناہ گاہوں میں پہنچا دیا ہے۔
سپاہ پاسداران انقلاب اسلامی ایران نے ہفتے اور اتوار کی درمیانی رات ایک بیان میں حملے شروع کرنے کا اعلان کیا، اس مشن کو آپریشن ٹرو پرومیس کا نام دیا گیا ہے، صیہونی حکومت کے متعدد جرائم کے جواب میں، آئی آر جی سی کے ایرو اسپیس ڈویژن نے بعض مخصوص علاقوں کے خلاف دسیوں میزائل اور ڈرونز داغے ہیں، اسرائیل کے زیر قبضہ علاقوں کے اندر اہداف کو نشانہ بنایا گیا ہے، سپاہ کے جاری کردہ بیان میں کہا گیا ہے کہ اس دوران ایران کے وزیر دفاع بریگیڈیئر جنرل محمد رضا اشتیانی نے خبردار کیا کہ جو بھی ملک ایران پر حملے کے لئے اسرائیل کو اپنی سرزمین یا فضائی حدود استعمال کرنے دیگا اُسے بھی ایران کی جانب سے فیصلہ کن جواب دیا جائے گا، اس سے قبل پینٹاگون نے کہا تھا کہ سیکریٹری دفاع لائیڈ آسٹن نے ہفتے کے روز اپنے اسرائیلی ہم منصب یوو گیلنٹ کے ساتھ فون پر رابطہ کیا اور فوری علاقائی خطرات پر بات چیت کی، امریکہ وزیر جنگ نے ایک بار پھر اس عزم کا اعادہ کیا کہ اسرائیل کے دفاع کے لئے امریکی حمایت جاری رکھی جائے گی، آسٹن نے گیلنٹ پر واضح کیا کہ اسرائیل ایران اور اس کے علاقائی مزاحمتی گروہوں کے کسی بھی حملے کے خلاف امریکہ اسرائیل کا دفاع کرئے گا۔