حماس کے مسلح ونگ القسام بریگیڈ نے اتوار کو کہا ہے کہ اس نے تل ابیب پر میزائلوں سے حملہ کیا ہے جبکہ اسرائیلی فوج نے راکٹوں کے خطرے کے پیش نظر مرکزی شہر میں سائرن بجائے ہیں، حماس کے عسکری ونگ القسام بریگیڈ نے اتوار کو اپنے ٹیلی گرام چینل پر کہا ہے کہ راکٹ حملہ فلسطینیوں کے خلاف اسرائیلی فوج کے قتل عام کا جواب ہے، الاقصیٰ ٹی وی کے مطابق راکٹوں کو غزہ کی پٹی سے لانچ کیا گیا ہے، حماس کے مسلح ونگ نے ہفتے کو غزہ کی پٹی میں کم از کم ایک اسرائیلی فوجی کو جنگی قیدی بنانے کا دعویٰ بھی کیا تھا، حماس کے عسکری ونگ القسام بریگیڈ کے ترجمان ابو عبیدہ نے کہا تھا کہ گروپ نے جبالیہ کیمپ میں ایک سرنگ میں اسرائیلی فورسز کو نشانہ بنایا اور ان کے تمام ارکان ہلاک، زخمی یا قیدی بنا لئے گئے، اس سے قبل عالمی عدالت انصاف (آئی سی جے) کی جانب سے رفح میں فوجی کارروائیاں فوری طور پر روکنے کے حکم کے اگلے ہی روز اسرائیل نے ہفتے کو غزہ کی پٹی پر بمباری کی تھی، غزہ کی وزارت صحت نے اتوار کو ایک بیان میں بتایا تھا کہ غزہ پر اسرائیلی فوج کے حملوں میں ابتک کم از کم 35 ہزار 984 فلسطینی شہری شہید ہوئے ہیں جبکہ 80 ہزار 643 زخمی ہیں۔
دوسری جانب اسرائیلی میڈیا نے بتایا کہ اسرائیل کے تجارتی مرکز تل ابیب میں کئی ماہ میں پہلی بار اتوار کو راکٹ سائرن بجنے لگے اور وسطی اسرائیل میں کم از کم تین دھماکوں کی اطلاعات موصول ہوئی ہیں، لبنان کے سرکاری میڈیا نے حزب اللہ کے قریبی ذرائع کے حوالے سے رپورٹ کیا ہے کہ اتوار ہی کو اسرائیل نے جنوبی لبنان پر فضائی حملہ کیا جس میں پانچ افراد شہید ہوئے ہیں، لبنان کی نیشنل نیوز ایجنسی (این این اے) نے رپورٹ کیا ہے کہ اسرائیلی دشمنوں نے حولا میں ایک موٹر بائیک کو نشانہ بنایا جس میں دو افراد شہید جبکہ دو زخمی ہوئے، اتوار کو جنوبی لبنان میں موٹر بائیک سواروں پر ہونے والا یہ تیسرا حملہ ہے۔