الیکشن کمیشن نے الیکٹرانک میڈیا پر سیاسی اشتہارات، بیانات و متن کے مسلسل چلائے جانے کا نوٹس لے لیا، الیکشن کمیشن نے چینلز کو ہدایت کی کہ الیکشنز ایکٹ 2017 کی دفعہ 182 اور کمیشن کے کوڈ آف کنڈکٹ برائے قومی میڈیا کی پابندی کو یقینی بنائیں، کمیشن نے کہا کہ پاکستان الیکٹرانک میڈیا ریگولیٹری اتھارٹی کو ایسے تمام چینلز کا محاسبہ کرنے کی ہدایت کردی گئی ہے، اس حوالے سے اعلامیے میں کہا گیا کہ کمیشن پیمرا کو یقین دہانی کرا دی ہے کہ الیکشنز ایکٹ 2017 کی دفعہ اور کمیشن کے کوڈ آف کنڈکٹ برائے قومی میڈیا گروپ کے تحت 6 فروری کی شب 12بجے کے بعد الیکشن مہم، اشتہارات و دیگر تحریری مواد کی الیکٹرانک اور پرنٹ میڈیا پر تشہیر پر پابندی ہے، انہوں نے کہا کہ اس پابندی کی خلاف ورزی کے مرتکب الیکٹرانک میڈیا چینلز کے خلاف سخت کارروائی کی جائے گی۔
چیف الیکشن کمشنر نے 8 فروری کو ہونے والے الیکشن کی تیاریوں پر اظہاراطمینان کیا ہے، تفصیلات کے مطابق چیف الیکشن کمشنر سکندر سلطان راجا کی زیرصدارت اجلاس ہوا جس میں تمام ونگز کے سربراہان نے انتخابی تیاریوں پر بریفنگ دی، بریفنگ میں کہا گیا کہ بیلٹ پیپر سمیت تمام انتخابی سامان کی ترسیل کاعمل آج رات تک مکمل ہو گا، چیف الیکشن کمشنر نے الیکشن کی تیاریوں پر اطمینان کا اظہار کرتے ہوئے پولنگ ڈے پر صوبائی الیکشن کمشنرز کو الرٹ رہنے کی ہدایت کی ہے، چیف الیکشن کمشنر سکندر سلطان راجہ نے عام انتخابات کے دوران چاروں صوبوں میں سکیورٹی سے متعلق بھی اہم ہدایت جاری کی ہیں، سکندر سلطان راجہ نے کہا کہ جلد از جلد سیکیورٹی اہلکاروں کی تعیناتی کو مکمل کیا جائے، ووٹرز، ڈی آر اوز اور آر اوز کے دفاتر کو مکمل سیکیورٹی فراہم کی جائے، انھوں نے بلوچستان میں دہشت گردی کے واقعات پر دکھ اور افسوس کا اظہار کیا، انھوں نے ہدایت کی کہ ایسے واقعات کے فوری تدارک کیلئے اقدامات اٹھائے جائیں۔