پاکستان تحریکِ انصاف نے تین مارچ کو انٹرا پارٹی الیکشن کروانے کا اعلان کیا ہے اور جماعت کے رہنما بیرسٹر گوہر کے مطابق بیرسٹر علی ظفر کو پارٹی کی چیئرمین شپ کا امیدوار نامزد کیا گیا ہے، جمعرات کو راولپنڈی میں صحافیوں سے بات کرتے ہوئے بیرسٹر گوہر خان کا کہنا تھا کہ بیرسٹر علی ظفر چیئرمین شپ جبکہ عمر ایوب جماعت کے جنرل سیکریٹری کے عہدے کے لئے امیدوار ہوں گے، انھوں نے کہا کہ پی ٹی آئی پارلیمان کا حصہ بن کر اپنا کردار ادا کرے گی، تحریکِ انصاف کی جانب سے جاری کردہ شیڈول کے مطابق انٹرا پارٹی الیکشن کے لئے کاغذاتِ نامزدگی 23 اور 24 فروری کو جمع کروائے جائیں گے اور جانچ پڑتال کے بعد ان پر حتمی فیصلہ 27 فروری کو ہوگا، پی ٹی آئی کے مطابق ان انتخابات کے لئے پولنگ جماعت کے مرکزی دفتر سمیت چاروں صوبائی سیکریٹریٹس میں ہو گی۔
خیال رہے کہ عام انتخابات سے قبل پی ٹی آئی نے اپنی جماعت میں انتخابات کا انعقاد کیا تھا جس میں بیرسٹر گوہر کو چیئرمین منتخب کیا گیا تھا تاہم اس انتخاب کو الیکشن کمیشن نے کالعدم قرار دیتے ہوئے جماعت سے اس کا انتخابی نشان واپس لے لیا تھا، پی ٹی آئی نے اس فیصلے کو پشاور ہائیکورٹ میں چیلنج کیا تھا اور عدالت نے الیکشن کمیشن کا یہ فیصلہ کالعدم قرار دے دیا تھا تاہم عدالتِ عالیہ کے فیصلے کے خلاف الیکشن کمیشن نے سپریم کورٹ سے رجوع کیا اور عدالت عظمیٰ نے الیکشن کمیشن کے فیصلے کو برقرار رکھا تھا، پاکستان کی تاریخ میں یہ پہلا موقع تھا جب ملک کی سب سے بڑی سیاسی جماعت نے انتخابی نشان کے بغیر الیکشن لڑا اور بھائی تعداد میں اپنے اُمیدواروں کو کامیاب کروایا۔
1 تبصرہ
تحریک انصاف جتنے چاہے الیکشن کرالے جب تک راجہ سکندر الیکشن کمشنر ہے وہ اس جماعت کو سیاسی جماعت نہیں مانے گا اس ملک میں موجودہ نظام کے تحت تبدیلی نہیں آسکتی