خضدار: آرمی اسکول بس پر حملے میں ہندوستان ملوث، پاکستان اسکا ثبوت فراہم کرئیگا، خواجہ آصف

پاکستان کے وزیر دفاع خواجہ آصف نے کہا ہے کہ پاکستان میں سرگرم دو بڑے دہشت گرد گروہ ہندوستان کیلئے کام کررہے ہیں اور اسلام آباد خضدار میں آرمی پبلک اسکول کی بس پر حملے میں نئی دہلی کے ملوث ہونے کے مکمل ثبوت جلد پیش کرے گا، یاد رہے کہ بدھ روز خضدار میں کوئٹہ کراچی شاہراہ پر زیرو پوائنٹ کے قریب ایک بم حملے میں اسکول بس کو نشانہ بنایا گیا تھا، جو خضدار چھاؤنی میں واقع آرمی پبلک اسکول میں طلبہ کو چھوڑنے جارہی تھی، واقعے میں 4 طالبات سمیت 6 افراد شہید جبکہ 38 افراد زخمی ہوئے تھے، حکام کے مطابق کم از کم ایک درجن زخمیوں کی حالت تشویشناک ہے، جبکہ زخمیوں میں 15 طالبات بھی شامل ہیں۔ وزیراعظم شہباز شریف اور فیلڈ مارشل سید عاصم منیر نے گزشتہ روز کوئٹہ میں زخمیوں کی عیادت کی جبکہ سکیورٹی فورسز نے حملے کے ذمہ داران کو بے رحمی سے انصاف کے کٹہرے میں لانے کے عزم کا اظہار کیا، خواجہ آصف نے دعویٰ کیا کہ کالعدم بلوچ لبریشن آرمی (بی ایل اے) بھارت کے ایجنٹ کے طور پر کام کررہی ہے، انہوں نے کہا کہ ہم ہندوستان کے ملوث ہونے کے ثبوت پیش کریں گے، ہم اپنے دعووں کو ٹھوس شواہد کے ساتھ ثابت کریں گے، انہوں نے کہا کہ بی ایل اے اور ہندوستان کے درمیان تعلقات سب پر عیاں ہیں کیونکہ ان کی قیادت نئی دہلی میں موجود ہے، ہم پر جو الزامات لگائے گئے وہ بے بنیاد تھے لیکن بی ایل اے ایک ہندوستانی ایجنٹ کی طرح بلوچستان میں فوج سے لڑرہی ہے، خواجہ آصف نے مزید کہا کہ بی ایل اے اور ٹی ٹی پی ہندوستان کے ایجنٹ ہیں، ان کا مذہب اور قوم سے کوئی تعلق ہیں، ہندوستان ان کی مالی معاونت کر رہا ہے اور یہ یہاں خونریزی میں ملوث ہیں، وزیر دفاع خواجہ آصف نے کہا کہ پاکستان پوری قوت سے حملہ کرے گا اور کسی قسم کی نرمی نہیں برتی جائے گی، انہوں نے کہا عام افراد خاص طور پر اسکول کے بچوں کو نشانہ بنانا ناقابلِ قبول ہے۔
پاکستان کے وفاقی وزیر دافاع خواجہ آصف نے ایک مرتبہ پھر پہلگام واقعے کی تحقیقات کا مطالبہ کیا تھا، جسے ہندوستان نے قبول نہیں کیا، ساتھ ہی انہوں نے کہا کہ دنیا کو آگاہ کیا جانا چاہیے کہ نریندر مودی کی حکومت ایک جھوٹے واقعے کو ایٹمی جنگ کی بنیاد بنانے کے لئے انتہائی غیر ذمہ دارانہ رویہ اختیار کررہی ہے، انہوں نے کہا کہ پاکستان ایٹمی تصادم کا آغاز نہیں کرے گا لیکن اگر ہمارے خلاف ایٹمی ہتھیار استعمال کیے گئے تو ہم خاموش نہیں رہ سکتے، خواجہ آصف نے واضح کیا کہ پاکستان نے تحمل کا مظاہرہ کیا، اس کے باوجود بھارت نے رات کی تاریکی میں ہمارے اڈوں پر حملہ کیا، یاد رہے کہ پاکستان اس سے قبل بلوچستان میں ہندوستان کے مذموم مقاصد کیلئے دہشت گردی کو ایک حربے کے طور پر استعمال کرنے پر ڈوزیئر دے چکا ہے، جس میں کلبھوشن یادو کی گرتاری اور تخریبی کارروائیوں کی تفصیلات بھی درج تھیں۔