رفح پر اسرائیلی فوج کی چڑھائی نے جنگ بندی مذاکرات کو برباد کردیا،قطری وزیراعظم

 قطری وزیر اعظم الشیخ محمد بن عبدالرحمٰن آل ثانی نے کہا ہے کہ رفح میں اسرائیلی آپریشن نے جنگ بندی کے مذاکرات کو پس پشت ڈال دیا ہے، انہوں نے منگل کو ایک بیان میں مزید کہا کہ ان کا ملک اسرائیل اور حماس کے درمیان اپنا ثالثی کا کردار جاری رکھے ہوئے ہے، اس نے چیلنجوں کے باوجود ثالثی نہیں روکی، انہوں نے وضاحت کی کہ غزہ کی پٹی میں جنگ بندی کے مذاکرات اختتام کو پہنچ چکے ہیں لیکن انہوں نے کہا کہ اسرائیل کی جنگ ختم کرنے کی پوزیشن واضح نہیں ہے، قطری وزیراعظم کی طرف سےیہ بیان ایک ایسے وقت میں سامنے آیا ہے جب دوسری جانب رفح میں اسرائیلی فوجی کارروائی نہ صرف جاری ہے بلکہ اسرائیل نے کارروائی کا دائرہ بڑھا دیا ہے، اسرائیلی فوج کےٹینک منگل کی صبح شہر کے مشرق میں گھس آئے اور الجیننہ، السلام اور برازیل کے محلوں میں داخل ہوگئے، واشنگٹن، دوحہ اور قاہرہ کی ثالثی میں ہونے والی بات چیت کا آخری دور ناکام ہوگیا تھا ان کوششوں کا مقصد ایک ایسی جنگ بندی تک پہنچنا تھا جس کے ذریعے غزہ کی پٹی میں قید اسرائیلیوں کی رہائی اور اسرائیلی جیلوں میں قید فلسطینیوں کی رہائی کو ممکن بنانے کیساتھ ساتھ مستقل جنگ بندی اور غزہ کی پٹی سے اسرائیلی فوج کی واپسی یقینی بنائی جائے تاہم دونوں فریقین نے ایک دوسرے کی تجاویز سے اتفاق نہیں کیا، حماس نے اعلان کیا تھا کہ اس نے جنگ بندی کے حوالے سے ثالثوں کی تجویز پر اتفاق کیا ہے تاہم اسرائیل نے اس تجویز کو مسترد کردیا تھا۔