خیبر پختونخوا کے ضلع شمالی وزیرستان میں سکیورٹی فورسز نے خفیہ اطلاع پر کارروائی کر کے فائرنگ کے تبادلے کے بعد 3 دہشت گرد کو ہلاک کردیا، پاکستانی فوج کے ترجمان کے مطابق شمالی وزیرستان کے علاقے رزمک میں فورسز نے خفیہ اطلاع پر کارروائی کی، انٹیلی جنس پر مبنی آپریشن میں سکیورٹی فورسز سے فائرنگ کے تبادلے میں 3 دہشت گرد ہلاک اور ایک زخمی ہو گیا، آئی ایس پی آر کے مطابق ہلاک ہونے والے دہشت گردوں کے قبضے سے اسلحہ اور گولہ بارود برآمد کر لیا گیا، بیان میں کہا گیا کہ علاقے میں موجود مزید دہشت گردوں کو ختم کرنے کیلئے صفائی کی جارہی ہے اور سکیورٹی فورسز ملک سے طالبان کی دہشت گردی کی لعنت کو ختم کرنے کے لئے پرعزم ہیں، واضح رہے کہ گزشتہ چند سالوں کے دوران ملک بالخصوص صوبہ خیبر پختونخوا اور بلوچستان میں دہشت گردوں کے حملوں میں بے پناہ اضافہ دیکھا گیا ہے اور فورسز ملک سے دہشت گردی کے خاتمے کیلئے آپریشن میں مصروف ہیں، گزشتہ روز خیبر پختونخوا کے ضلع کرم میں پاک فوج نے کارروائی کرتے ہوئے 7 خوارج کو ہلاک کردیا تھا، دو دن قبل جنوبی وزیرستان میں چیک پوسٹ پر حملے میں 4 فرنٹیئر کانسٹیبلری (ایف سی) اہلکار شہید جبکہ 27 دیگر زخمی ہوگئے تھے۔
دس اگست کو ضلع خیبر کی وادی تیراہ میں تین مختلف مقامات پر سکیورٹی فورسز اور خوارج کے درمیان فائرنگ کے تبادلے میں 4 دہشت گرد ہلاک جبکہ سکیورٹی فورسز کے 3 جوان شہید ہوگئے تھے، دوسری طرف ضلع چاغی کے علاقے دالبندین سے 5 افراد کی لاشیں برآمد ہوئی ہیں، تمام افراد کو گولیاں مار کر قتل کیا گیا ہے، جن کی لاشیں اسپتال منتقل کردی گئی ہیں جہاں ان کی شناخت کا عمل جاری ہے، ریسکیو عملے کی جانب سے لاشوں کو کھمبوں سے الگ کرکے اسپتال منتقل کیا گیا جب کہ پولیس نے جائے وقوع سے شواہد اکٹھے کرکے تحقیقات شروع کردی ہے۔