وفاقی وزارتوں اور ڈویژنز کی حساس معلومات چرانے کے لئے ہیکرز سرگرم ہوگئے، جعلی ای میلز کے ذریعے وزارتوں اور ڈویژنز کی معلومات حاصل کرنےکی کوششیں کی جارہی ہیں، پاکستان کے ایک اہم میڈیا ہاؤس نے خبر بریک کرتے ہوئے کہا ہے کہ کابینہ ڈویژن نے تمام وفاقی وزارتوں اور ڈویژنز کو مراسلہ بھجوا کر اس حوالے سے متنبہ کردیا گیا ہے، مراسلے کے مطابق جے ایس کوآرڈ کے نام سے جنم لینے والی جعلی ای میلز زیر گردش ہیں، فیک ای میلز کے ساتھ خطرناک پے لوڈز منسلک ہیں، یہ فیک ای میلز وزارتوں کے نیٹ ورک/سسٹم کی سکیورٹی کو نقصان پہنچا سکتی ہیں، ذرائع کے مطابق مراسلے میں وزارتوں، ڈویژنوں کو انجان، غیر انجان ای میلز موصول ہونے پر محتاط رویہ اپنانے، اہم معلومات کی درخواست کرنے والی ای میلز کی اسکروٹنی کرنے جبکہ موصول ای میل کا ایڈریس اورڈومین کی پیشگی تصدیق کرنے کی تجویز دی گئی ہے۔
کابینہ ڈویژن مراسلے میں انجان ای میل آئی ڈی سے موصول ہونے والی ای میل کے ساتھ منسلک دستاویز نہ کھولنے کی بھی تجویز دی گئی ہے، کابینہ ڈویژن نے اپنے مراسلے میں یہ نہیں بتایا کہ حساس معلومات چوری کرنے میں کوئی ملک ملوث ہے یا گروہ رقم لینے کیلئے معلومات کی چوری کرنا چاہتا ہے، یہ مراسلہ ایسی حالت میں جاری کیا گیا ہے جب ملک میں غیر اعلانیہ سنسر شپ عائد ہے اور حکومت کی جانب سے عوامی مفاد میں معلومات کو بھی پوشیدہ رکھا جاتا ہے۔