بلوچستان کے دارالحکومت کوئٹہ میں گاڑی پر مسلح افراد کی فائرنگ سے سوئی سدرن گیس کمپنی کے ڈپٹی ڈائریکٹر جاں بحق ہوگئے، میڈیا رپورٹس کے مطابق سوئی سدرن گیس کمپنی کے ڈپٹی ڈائریکٹر منیر احمد لہڑی گھر سے آفس جارہے تھے، پولیس نے بتایا ہے کہ بلوچستان کے شہر کوئٹہ میں منوجان روڈ ہدہ میں مسلح افراد کی جانب سے ایک گاڑی پر فائرنگ کی گئی، جس کے نتیجے میں سوئی سدرن گیس کمپنی کے ڈپٹی ڈائریکٹر منیر احمد لہڑی جاں بحق ہوگئے، پولیس کے مطابق منیر احمد لہڑی کی لاش کو پوسٹ مارٹم کے لئے سول ہسپتال منتقل کردیا گیا، جب کہ پولیس نے جائے وقوعہ پر پہنچ کر مزید تحقیقات شروع کردی ہے، واضح رہے بلوچستان میں علیحدگی پسند بلوچ اور دہشت گرد تنظیمیں داعش اور کالعدم تحریک طالبان پاکستان مسلح کارروائیوں میں ملوث رہے ہیں تاہم ابھی تک کسی تنظیم نے منیر احمد لہری کو ہلاک کرنے کی ذمہ داری نہیں لی ہے، دوسری طرف پاکستان فوج کے ترجمان کی جانب سے جاری ایک بیان میں دعویٰ کیا گیا ہے کہ سوموار کے دن خیبر اور لکی مروت میں دو مختلف کارروائیوں کے دوران مبینہ طور پر نو شدت پسند ہلاک ہو گئے۔
پاکستانی فوج کے مطابق خیبر ضلع کے تیراہ علاقے میں انٹیلی جنس آپریشن کیا گیا جہاں کمانڈر نجیب عرف عبد الرحمان اور اشفاق عرف معاویہ سمیت سات شدت پسند ہلاک ہوئے، بیان کے مطابق ہلاک ہونے والے شدت پسند قانون نافذ کرنے والے اداروں کو مطلوب تھے جن سے اسلحہ، ایمونشین اور بارودی مواد بھی بازیاب ہوا، آئی ایس پی آر کے مطابق لکی مروت ضلع میں ہونے والے ایک اور آپریشن کے دوران فوجی اہلکاروں نے مبینہ طور پر دو شدت پسندوں کو ہلاک کیا، خیال رہے صوبہ خیبرپختونخوا کے بعض اضلاع دہشت گردی کی لپیٹ میں ہیں اور پاکستانی فوج عزم پاکستان آپریشن لانچ کرنے کا منصوبہ بنایا تھا جوکہ سیاسی جماعتوں کی مخالفت کے باعث مشکلات کا شکار ہے۔