لبنان کی مزاحمتی تحریک حزب اللہ کا کہنا ہے کہ اس نے مقبوضہ علاقوں میں اسرائیل کے فوج اور انٹیلی جنس تنصیبات پر راکٹ اور ڈرونز سے کامیاب حملے کئے، حزب اللہ کے بیان میں کہا گیا ہے حملوں کی سیریز میں ایک راکٹ سالو نے میشر بیس کو نشانہ بنایا جوکہ غاصب اسرائیل کا شمالی علاقے کیلئے انٹیلی جنس ہیڈکوارٹر ہے، اس سے قبل بھی حزب اللہ نے اس ہیڈکوارٹر کو ایک سے زائد مرتبہ نشانہ بناچکی ہے جس کے دوران قیمتی حساس آلات تباہ ہوئے ہیں، ہفتے کو کئے گئے حملے میں دو ریڈار بھی تباہ ہوئے، راس النقورہ کے المشریفہ علاقے میں حزب اللہ کے جنگجوؤں نے متعدد راکٹوں سے اسرائیلی دشمن افواج کے ایک اجتماع کو نشانہ بنایا، جس کے نتیجے 8 اسرائیلی فوجی ہلاک اور متعدد زخمی ہوگئے، حزب اللہ نے حیفہ کے قریب کریوٹ کے مضافات سمیت شمالی مقبوضہ علاقوں کے پانچ رہائشی یونٹوں پر بھی راکٹ فائر کئے، اسرائیل نے تسلیم کیا کہ حزب اللہ نے ہفتے کے روز سرحد پار سے تقریباً 80 میزائل فائر کیے تھے، اس سے قبل حزب اللہ نے تل ابیب کے جنوب میں اسرائیل کے تل نوف ایئربیس پر ڈرون حملہ کیا۔
حزب اللہ نے ہفتے کے روز لبنانی گاؤں ایتا الشعب کے مضافات میں اسرائیلی فوجیوں پر متعددراکٹوں سے حملہ کیا، اس دوران لبنان کے میڈیا نے اطلاع دی کہ اسرائیل فوجی دستوں نے ہفتے کے روز لبنان کے ایک سرحدی گاؤں میں متعدد خالی مکانات کو نقصان پہنچایا، سرکاری نیشنل نیوز ایجنسی نے کہا کہ اسرائیلی فوج نے صبح کے بعد سے سرحدی گاؤں ادیسہ میں مکانات کو دھماکے سے اڑا دیا، لبنان کی وزارت صحت نے بھی ایک بیان میں کہا ہے کہ جنوبی لبنان میں ایک طبی مرکز پر اسرائیلی حملے میں ایک طبی کارکن جاں بحق اور کم از کم پانچ افراد زخمی ہوئے، بازوریہ میں ایک طبی مرکز پر اسرائیلی دشمن کے چھاپے کے نتیجے میں ایک شخص ہلاک ہو گیا، اس موت سے لبنان میں 23 ستمبر کو اسرائیل کے حملے کے بعد سے ہلاک ہونے والے امدادی کارکنوں اور طبی عملے کی تعداد 164 ہو گئی ہے۔