پاکستان اٹامک انرجی کمیشن کے اہلکاروں اور ایک منصوبے پر کام کرنے والے مزدوروں کے اغوا کا مقدمہ درج کر لیا گیا ہے لیکن تاحال کوئی گرفتاری عمل میں نہیں آئی، خیال رہے کہ کالعدم تحریکِ طالبان پاکستان نے ان افراد کے اغوا کی ذمے داری قبول کی ہے، خیبر پختونخوا کے ضلع لکی مروت میں جمعرات کی صبح پاکستان اٹامک انرجی کمیشن سے منسلک 16 افراد کو نامعلوم افراد نے قابل خیل کے مقام پر ایک نجی مسافر بس سے اتار کر اغوا کرلیا تھا، لکی مروت کے تھانہ صدر کے ایس ایچ او شکیل خان کی مدعیت میں جمعے کو واقعے کا مقدمہ درج کر لیا گیا ہے جب کہ مغویوں کی بازیابی کیلئے کوششوں بھی شروع کر دی گئی ہیں، نامعلوم دہشت گردوں کے خلاف درج مقدمے میں دہشت گردی کی دفعات بھی شامل کی گئی ہیں، لکی مروت واقعے کے بعد ایک سرکاری بیان میں دعویٰ کیا گیا تھا کہ آٹھ مغوی بازیاب کرا لئے گئے ہیں، سرکاری بیان کے مطابق مغویوں کی بازیابی کی کارروائی کے دوران تین افراد زخمی بھی ہوئے تھے جو فوجی اسپتال میں زیرِ علاج ہیں اور ان میں سے دو کی حالت نازک ہے، دوسری جانب کالعدم شدت پسند تنظیم تحریک طالبان پاکستان نے فورسز کی کارروائی میں آٹھ مغویوں کی بازیابی کے دعوے کو مسترد کیا ہے، ایک بیان میں شدت پسند تنظیم نے کہا ہے کہ جن افراد کی بازیابی کا دعویٰ کیا جا رہا ہے، انہیں مزدور ہونے کی وجہ سے چھوڑ دیا تھا۔
تحریک طالبان پاکستان کے مطابق ان کے پاس موجود دیگر آٹھ مغوی پاکستان اٹامک انرجی کمیشن کے ملازمین ہیں جنہیں محفوظ مقام پر منتقل کر دیا گیا ہے، شدت پسند تنظیم کے مطابق مغویوں کو مطالبات کے تسلیم ہونے کے لئے اغوا کیا ھے اور مطالبات حکومت تک پہنچا دیئے گئے ہیں، تاہم کالعدم ٹی ٹی پی نے بیان میں مطالبات کی تفصیل بیان نہیں کی ہے، مقامی افراد کے مطابق جمعرات کی صبح آٹھ بجے لکی مروت سے ایک گاڑی اٹامک انرجی کمیشن اف پاکستان کے اہلکاروں کو لے کر قبول خیل کی طرف جا رہی تھی۔ وانڈا پائندہ خان کے قریب کالعدم تنظیم کے شدت پسندوں نے اس گاڑی سے 17 ورکرز کو اتار لیا اور اپنے ساتھ لے گئے اور گاڑی کو نذرِ آتش کردیا، اغوا کار ابتدائی طور پر اغوا کیے جانے والے افراد کو وانڈا پائندہ خان والے جنگل کی طرف لے گئے، اغوا کیے جانے والوں میں سکیورٹی فورسز کے ریٹائرڈ اہلکار بھی شامل ہیں، لکی مروت میں پاکستان اٹامک انرجی کمیشن کے اہلکاروں کے اغوا سے چند گھنٹے قبل انسدادِ دہشت گردی پولیس نے ضلع لکی مروت گمبیلا میں کالعدم تنظیم کے شدت پسندوں کے خلاف مخبروں کی اطلاع پر کاروائی کر کے تین شدت پسندوں کو ہلاک کر دیا تھا۔