جنگ اور بلواسطہ مذاکرات دونوں کی تیاریاں عروج پر پہنچ گئیں، حملہ ہوا تو ایٹمی ہتھیار بنالیں گے

ایران نے اپنے غدیر ریڈار سسٹم کی صلاحیتوں میں اضافہ کرکے کر اپنے فضائی دفاعی نظام کو مزید مضبوط بنالیا ہے، جو دشمن کے میزائلوں یا ڈرون حملوں کا پتہ لگانے کے بعد منسلک میزائیلز بیٹریوں کو از خود فعال کرکے دشمن کے حملے کو ناکام بناسکتا ، غدیر ریڈار سسٹم کو ایران کے شمال مغرب اور خلیج فارس کے اسٹریٹجک مقامات پر نصب کیا گیا ہے تاکہ امریکہ یا اسرائیل کے کسی ممکنہ حملے کو ناکام بنایا جاسکے، ایرانی فوج کے بریگیڈیئر جنرل فرزاد اسماعیلی نے کہا کہ یہ نظام الیکٹرانک جنگ میں ایران کی طاقت کا اظہار ہے اور اس ریڈار سسٹم کااینٹی راڈار میزائلوں کے ذریعے پتہ لگانا اور اسے تباہ کرنے کاامکان بہت زیادہ معدوم ہے، جوہری معاہدے کیلئےتہران پر واشنگٹن کے دباؤ کی صورتحال میں خلیج فارس اور ایران کی ایٹمی تنصیبات کے راستے میں غدیر ریڈار سسٹم کی تنصیب کواہم پیشرفت قرار دیا جارہا ہے۔
امریکی صدر ڈونلڈ ٹرمپ نےدوسری بار وائٹ ہاؤس پہنچنے کے بعد متعدد مرتبہ ایران کوجوہری ہتھیار وں سے دور رکھنے کی ڈیل پر اتفاق کرنےکی آفر کرنے کیساتھ ساتھ اس کی ایٹمی تنصیبات پر حملہ کرنے کی دھمکی بھی دی ہے اور کہا ہے کہ اگر ایران کیساتھ جوہری معاہدے کیلئے میز پر نہیں بیٹھا توامریکی فضائیہ ایران کی ایٹمی تنصیبات پر حملہ کردے گی تاہم تہران اور واشنگٹن دونوں نے اس بات کی تصدیق کردی ہے کہ اس ہفتہ 12 اپریل 2025ء سے اومان کی وساطت سے دونوں ملکوں کے درمیان ایران کے جوہری پروگرام کو ہتھیار سازی کی طرف بڑھنے سے روکنے اور امریکی پابندیاں ختم کرنے کےدو نکاتی ایجنڈے پر مذاکرات ہونے جارہے ہیں، امریکہ نے مذاکرات شروع کرنے کیلئےتہران کی براہ راست مذاکرات نہ کرنے کی شرط کو تسلیم کرلیا ہے ، یہاں اس بات کی بڑی اہمیت ہے کہ ایران کی سپریم لیڈر آیت اللہ خامنہ ای کے سکیورٹی ایڈوائیزر علی لاریجانی نے واضح طور پر واشنگٹن پر واضح کردیا ہے کہ ایران پر کسی بھی طرح کا حملہ تہران کو ایٹمی ہتھیار بنانے سے نہیں روک سکے گا۔