ہندوستان ریاستی دہشت گردی میں ملوث ہے پاکستان کے پاس ثبوت موجود ہیں، جنرل احمد شریف

پاکستانی فوج کے ترجمان لیفٹیننٹ جنرل احمد شریف چوہدری نے پاکستان میں ہندوستان کی ریاستی دہشت گردی کے ثبوت پیش کرتے ہوئے کہا ہے کہ ہندوستان، پاکستان میں دہشت گردی پھیلا رہا ہے، انہوں نے کہا کہ پہلگام واقعے کو 7 دن گزرگئے لیکن اب تک بھارت کی جانب سے پاکستان پر لگائے گئے بے بنیاد الزامات سے متعلق کوئی ثبوت فراہم نہیں کیے گئے، صرف زبانی جمع خرچ چل رہا ہے لیکن ہم آپ کو بھارت کی ریاستی دہشت گردی کے ثبوت پیش کر رہے ہیں کہ وہ کس طرح پاکستان میں دہشت گردی کروا رہا ہے جس میں بھارت کا حاضر سروس افسر بھی شامل ہے، ان کا کہنا تھا کہ بھارت کس طرح پاکستان کے اندر دہشت گرد نیٹ ورک چلا رہا ہے ، ہمارے پاس ثبوت موجود ہیں اور دہشت گردوں کو ملٹری سمیت معصوم شہریوں کو نشانہ بنانے کیلئے آئی ای ڈیز سمیت دیگر مواد فراہم کر رہا ہے، چوہدری نے بتایا کہ 25اپریل یعنی 4 دن پہلے جہلم بس اسٹینڈ سے بھارت کے تربیت یافتہ دہشت گرد عبدالمجید کو گرفتار کیا گیا جس کے پاس سے ڈھائی کلو وزنی بم، 2 موبائل فون اور 70 ہزار روپے کیش برآمد ہوا جب کہ اس کے گھر سے ایک بھارتی ساختہ ڈرون اور 10 لاکھ روپے کیش برآمد ہوا۔
جنرل شریف نے بتایا کہ واٹس ایپ پر ہونے والی بات چیت کے دوران دہشت گرد کو بھارت سے لوکیشن مل رہی ہے اور اسے بتایا جارہا ہے کہ کسی اور کے ذریعے آئی ای ڈی آپ تک پہنچ رہی ہے، پھر وہ پوچھ رہا ہے کہ ہوگیا پارسل، آپ وقت سے نکل جانا اور جلدی پہنچنا جس پر دہشت گرد اسے اوکے کا جواب دیتا ہے کہ میں تھوڑی دیر میں نکل رہا ہوں اور اسے لوکیشن بھی بھیجتا ہے، ڈی جی آئی ایس پی آر نے کہا کہ دہشت گرد کی اپنے ہینڈلر سے ہونے والی گفتگو کے دوران مزید 4 کرداروں کی نشاندہی کی گئی، جو اس سیل کو چلارہے ہیں، جن میں میجر سندیپ ورما، جس کی شناخت (سمیر) کے نام سے بھی ہے وہ غیر قانونی طور پر مقبوضہ کشمیر میں تعینات ہے، صوبیدار سکھویندر، حوالدار امیت اور ایک سپاہی شامل ہے، ان کا مزید کہنا تھا کہ ہندوستان کے حاضر سروس افسر نے دہشت گرد سے کہا کہ میں یہاں ایک دو دن کیلئے نہیں آیا میں سالوں سے دہشت گردی کررہا ہوں اور آگے بھی کرتا رہوں گا، انہوں نے کہا کہ یہ بھارت کی ریاستی دہشت گردی کی واضح مثال ہے اور یہ صرف ایک سیل ہے جو آپ کے سامنے پیش کیا جارہا ہے جو 25 اپریل کو پکڑا گیا تھا جس نے 4 دہشت گردی کے واقعات کیے۔