ہندوستان کا پاکستانی سرحدوں کے اندر حملہ اعلان جنگ ہے مسعود اظہر کے دس رشتے دار جاں بحق!

تحریر: محمد رضا سید
ہندوستان کی فضائیہ نے پاکستانی سرحدوں کے اندر حملہ کیا ہے ، اس جارحیت نے دو ایٹمی ملکوں کے درمیان جنگ کا دروازہ کھول دیا،ہندوستانی حملے کے نتیجے میں دو درجن سے زائد پاکستانی شہری شہید اور متعدد زخمی ہو چکے ہیں، نئی دہلی نے اعلان کیا ہے کہ اُس نے پاکستان فوجی تنصیبات کو نشانہ نہیں بنایا ہےتاہم پاکستان نے ہندوستان کی اس جارحیت کو اعلانِ جنگ قرار دیا ہے، افواجِ پاکستان کے ترجمان، جنرل احمد شریف نے کہا ہے کہ ہندوستان کو پاکستانی سرزمین پر حملے کی سزا ضرور دی جائے گی اور پاکستان اپنے اہداف لاک کر چکا ہے، پاکستانی شہریوں کی جانب سے مطالبہ کیا جا رہا ہے کہ ہندوستان میں موجود دہشت گرد گروہ آر ایس ایس کی کمین گاہوں کو نشانہ بنایا جائے، جو انڈین انٹیلی جنس کے ساتھ مل کر پاکستان کے مختلف شہروں، خیبر پختونخوا اور افغانستان کی سرحد پر دہشت گردی میں ملوث ہے۔
جنگی صورتحال کے باعث اطلاعات میں تضاد اور غلط معلومات کی وجہ سے اس وقت یہ کہنا مشکل ہے کہ پاکستانی افواج کے جوابی اقدامات سے ہندوستان کو کتنا نقصان پہنچا ہے، پاکستان نے تسلیم کیا ہے کہ ہندوستانی طیاروں نے اپنی سرحدی حدود میں رہتے ہوئے میزائل فائر کیے ہیں، جبکہ ہندوستانی میڈیا کا دعویٰ ہے کہ ان میزائلوں میں پاکستانی ریڈارز سے بچنے کی صلاحیت موجود تھی۔
ادھر پاکستان میں کالعدم تنظیم جیش محمد کے سربراہ مسعود اظہر نے دعویٰ کیا ہے کہ ہندوستانی حملے میں ان کے 10 قریبی رشتہ دار مارے گئے ہیں، ان کے مطابق بہاولپور میں جامع مسجد سبحان اللہ پر کیے گئے حملے میں ان کی بڑی بہن اور بہنوئی، دو بھانجے، ایک بھانجی، ان کے شوہروں سمیت پانچ بچے بھی شہید ہوئے،ان کا کہنا ہے کہ منگل کی شب ہونے والے حملے میں ان کے ایک قریبی ساتھی اُس کی والدہ اور دو دیگر ساتھی بھی مارے گئے، اپنے بیان میں مسعود اظہر نے ہندوستانی وزیرِاعظم نریندر مودی کو تنقید کا نشانہ بناتے ہوئے کہا ہے کہ اس نے ظلم کی تمام حدیں پار کر دی ہیں، اب ہم سے رحم کی امید نہ رکھی جائے۔
دوسری جانب ہندوستان کی نِفٹی 50 انڈیکس میں 0.6 فیصد کمی واقع ہو کر یہ 24,233.3 پوائنٹس پر آ گئی، بدھ کی صبح جب پاکستان اسٹاک ایکسچینج میں کاروبار کا آغاز ہوا تو سرمایہ کاروں میں بے چینی دیکھی گئی اور حصص کی فروخت میں تیزی آئی، جو اس بات کا اشارہ ہے کہ سرمایہ کاروں کے حوصلے جنگ جھیلنے والے نہیں ہیں ، اس سے یہ بات بھی عیاں ہوجاتی ہے جنگ میں تیزی آئی تو دونوں ملکوں کو معاشی نقصان سہنا پڑے گا۔
ادھر ہندوستان کے وزیرِ داخلہ، امت شاہ نے ایکس پر جاری بیان میں کہا ہے کہ آپریشن سندور پہلگام میں ہمارے معصوم شہریوں کے بہیمانہ قتل کا جواب ہے، ان کے مطابق مودی حکومت ہر قسم کے حملے کا بھرپور جواب دینے کے لئے تیار ہے اور ہندوستان دہشت گردی کو جڑ سے ختم کرنے کا عزم رکھتا ہے، امت شاہ کو مودی کا جانشین بننے کیلئے اپنے آپ کو شدت پسندوں کے سامنے اہل ثابت کرنے کیلئے اپنے ملک میں جنگی جنون بھڑکانے میں مصروف ہیں، واضح رہے کہ 22 اپریل کو مقبوضہ کشمیر کے سیاحتی مقام پہلگام میں ایک حملے میں 26 افراد ہلاک ہوئے تھے، جسے پاکستان نے فالس فلیگ آپریشن قرار دیا ہے، پاکستان کے وزیراعظم شہباز شریف نے اس واقعے کی بین الاقوامی تحقیقات کی تجویز پیش کی تھی، جسے ہندوستانی حکومت نے مسترد کر دیا، جس سے فالس فلیگ آپریشن کے متعلق شبہات مزید گہرے ہو گئے۔
عالمی ذرائع ابلاغ کے مطابق، ہندوستانی جارحیت کے جواب میں پاکستانی ردِعمل کے نتیجے میں انڈین ایئر فورس کا کم از کم ایک طیارہ تباہ ہونے کی تصدیق کی ہے جبکہ پاکستانی میڈیا کا دعویٰ ہے کہ پاکستان نے پانچ سے چھ ہندوستانی طیارے مار گرائے ہیں، پاکستان کی سرکاری اطلاع کے مطابق، فرانس کے تیار کردہ تین رافیل طیاروں کو نشانہ بنایا گیا ہے، جو ایک بڑی دفاعی کامیابی تصور کی جا رہی ہےتاہم ہندوستان کی جنگی سوچ کو ختم کرنے اور عالمی قوانین کے دائرے میں لانے کے لئے پاکستان کو یقیناً ہندوستان کے اندر جوابی کارروائی کرنی ہوگی کیونکہ اس نے پاکستانی سرزمین پر حملہ کرنے کی جرات کی ہے، یہ یاد رکھنا ضروری ہے کہ جنگ ہندوستان کے لئے زیادہ نقصان دہ ثابت ہوگی، ہندوستان اقوام متحدہ کی سلامتی کونسل میں مستقل رکن بننے کا خواہشمند ہےاور جنگ اس کے اس مقصد کو خطرے میں ڈال سکتی ہے۔
پاکستان اور ہندوستان کی عوام کی اکثریت جنگ سے بیزار ہیں لیکن مودی حکومت نے سیاسی مفادات کے لئے جنگی جنون پیدا کیا، جس کی قیمت دونوں ممالک کی افواج اور عوام کو چکانی پڑ رہی ہے، جو افسوسناک صورتحال ہوگی اور جس طرف امریکی صدر ٹرمپ نے بھی اشارہ کیا جس وہ معمول کے مطابق پریس کانفرنس کرہے تھے اور اس دوران انہیں ہندوستانی جارحیت کے متعلق اطلاع دی گئی، جس پر انھوں نے اپنے ابتدائی ردعمل میں افسوسناک قرار دیا ، ہندوستانی فوج مودی اور آر ایس ایس کی سیاست کی بھینٹ چڑھنے کی طرف بڑی تیزی سے بڑھ رہی ہے، اس بارے میں ہندوستان کی سکیولر اکثریت کو آگے بڑھنا ہوگا، اگرچہ ایک بڑی جنگ دونوں طرف انسانی جانوں کا ضیاع ثابت ہوگی پھر بھی پاکستان کو ہندوستان کے جنونی رویے کا منہ توڑ جواب دینا ضروری ہےاگر جارحیت کا جواب نہ دیا گیا تو ہندوستانی ہر انتخابات کے موقعے پر ایسی دراندازی کا سلسلہ جاری رکھے گا، ہندوستانی وزیر دفاع یہ تسلیم کر چکے ہیں کہ ان کے ملک نے پاکستان میں سویلین اہداف پر فوجی کارروائیاں کی ہیں، ہندوستان کی خفیہ کارروائیوں میں مبینہ عسکریت پسندوں کو ہلاک کیا گیا ہےلیکن پہلگام واقعے کے ذمہ داروں کو نہ گرفتار کیا گیا اور نہ ہی کوئی ناقابلِ تردید ثبوت فراہم کیا ، اس کے باوجود پاکستانی حدود پر حملہ کرکے ہندوستان نے اپنے آپ کو ایک جارح ملک کے طور پر پیش کر دیا ہے۔
پاکستان نے ہمیشہ اچھے ہمسایوں جیسے تعلقات کیلئے صبر کا مظاہرہ کیا، یہاں تک کہ جب ہندوستان نے اقوام متحدہ کی قراردادوں کو نظر انداز کر کے مقبوضہ کشمیر کا اسٹیٹس تبدیل کیا، تب بھی پاکستان نے جنگ کا راستہ اختیار نہیں کیا لیکن اگر اب بھارت نے جنگ چھیڑ دی ہےتو پاکستان کے پاس موقع ہے کہ وہ کشمیری عوام کی مایوسی کو ختم کرے، ان پر ہونے والے ظلم کا ازالہ کرے اور ان مجاہدین پر عائد ناروا پابندیاں ہٹائے جو مقبوضہ کشمیر میں آزادی کی جدوجہد کر رہے ہیں۔