سندھ میں دینگی بے قابو انتظامی سطح پر ہنگامی اعلانات ستمبر میں محکمہ موسمیات کا ڈینگی الرٹ جاری

تحریر: محمد رضا سید
سندھ کے محکمہ صحت نے بتایا ہے کہ صوبے میں ڈینگی کے مزید 3 مریض انتقال کر گئے ہیں، جن میں 2 خواتین بھی شامل ہیں، جس کے بعد اس سال مجموعی اموات 36 ہوگئی ہیں، محکمہ صحت نے بتایا کہ گزشتہ 24 گھنٹے کے دوران صوبے کے مختلف ہسپتالوں میں ڈینگی کے 180 نئے مریض داخل ہوئے، جن میں سے 113 سرکاری ہسپتالوں اور 57 نجی ہسپتالوں میں داخل کیے گئے، اس وقت صوبے بھر کے سرکاری اور نجی ہسپتالوں میں 241 مریض زیر علاج ہیں، کراچی ڈویژن میں 44 مریض سرکاری ہسپتالوں میں داخل ہوئے، حیدرآباد میں 35 اور دیگر اضلاع سے 34 مریض داخل ہوئے، محکمے نے بتایا کہ گزشتہ 24 گھنٹوں میں کل 5 ہزار 229 ڈینگی ٹیسٹ کیے گئے، جن میں سے 774 مثبت آئے، اسی دوران 191 مریض صحتیاب ہو کر ہسپتالوں سے ڈسچارج ہوئے، صحت کے حکام نے شہریوں سے اپیل کی ہے کہ وہ حفاظتی اقدامات کریں، مچھروں کی افزائش کے مقامات ختم کریں اور علامات ظاہر ہونے پر فوری طور پر طبی امداد حاصل کریں، سندھ میں ڈینگی کی موجودہ صورتحال واقعی تشویشناک ہے اور اس میں حکومت کی کارکردگی پر مختلف تنقیدیں سامنے آرہی ہیں، رپورٹ ہے کہ 2025 کے پہلے دس ماہ میں ڈینگی کے کیسز 12.6 فیصد بڑھ گئے ہیں، جیسا کہ صوبائی ہیلتھ ڈپارٹمنٹ کا کہنا ہے، صرف 24 گھنٹے میں سندھ میں 1,213 نئے ڈینگی کیس رپورٹ ہوئے ہیں، اکتوبر 2025 میں سندھ میں مزید 439 نئے تصدیق شدہ کیسز رپورٹ ہوئے ہیں، جو کہ صوبائی حکومت کیلئے ایک اشارہ تھا، رواں سال دینگی سے پہلی موت 24 سالہ مرد کی تھی، جو کراچی انسفیکٹس ڈیزیز ہسپتال میں زیرِ علاج تھا، جاری بحران میں مختلف رپورٹس میں مزید اموات کی باتیں ہیں، اور بعض میں کہا گیا ہے کہ سرکاری اعداد و شمار، نجی ہسپتال کی رپورٹس کو شامل نہیں کررہے ہیں، سندھ کے چیف سیکرٹری نے ہنگامی اجلاس میں انسدادِ ڈینگی کے اقدامات تیز کرنے کی ہدایات دیں، جس میں فومیگیشن، لاروی کنٹرول، اسپرے آپریشنز اور یو سی (یونین کونسل) سطح پر اقدامات شامل ہیں،
پاکستان موسمیاتی ڈیپارٹمنٹ نے ڈینگی الرٹ جاری کیا ہے، کیونکہ حالیہ موسمی حالات (بارش، درجہ حرارت، نمی) ایسے ہیں کہ مچھروں کیلئے افزائش کے مواقع زیادہ ہیں، صوبائی ڈیزاسٹر منیجمنٹ اتھارٹی نے خبردار کیا ہے، سیلاب اور پانی جمع ہونے کی صورتحال (اسٹگنٹ واٹر) نے مچھر کی افزائش کو مزید بڑھا دیا ہے، حکومتی اعداد و شمار (ہیلتھ ڈپارٹمنٹ) اور نجی لیبز کی رپورٹس میں فرق ہے۔ مثال کے طور پر، کچھ لیبز نے اکتوبر میں بہت زیادہ مثبت نتائج درج کیے ہیں لیکن وہ سرکاری اعداد میں شامل نہیں کیے گئے، ڈسٹرکٹ ہیلتھ آفیسرز اور بعض مقامی لیبز حکومت سے مطالبہ کر رہے ہیں کہ لیب کے مثبت کیسز کو روزانہ کی بنیاد پر صحت محکمے کے ڈیٹا میں شامل کیا جائے، سندھ میں صحت کے شعبے سے وابستہ افراد کا کہنا ہے کہ سندھ حکومت نے بحران سے نمٹنے کیلئے خاطر خواہ اقدامات نہیں کئے جبکہ دینگی کا الرٹ ستمبر میں جاری کردیا گیا تھا، خاص طور پر ڈیٹا شفافیت، پیشگی تیاری اور مستقل لاروی کنٹرول میں سندھ کا محکمہ صحت میں مکمل طور پر ناکام ہوئی ہے، یہ کہنا ممکن ہے کہ تمام بڑھتے ہوئے کیسز مکمل طور پر سندھ حکومت کی ناکامی نہ ہیں، سندھ حکومت نے مختلف اقدامات کیے ہیں مثلاً فومیگیشن، لیب سہولیات، وارڈز، مانیٹرنگ رومز وغیرہ لیکن ان کا دائرہ، معیار اور مستقل مزاجی سوالیہ نشان ہے، ڈینگی وارڈز میں بستر مختص تو کیے گئے ہیں لیکن مریضوں کی تعداد کے مسلسل بڑھنے پر طبی انفراسٹرکچر پر بوجھ بڑھ رہا ہے۔ اسی طرح نجی لیبز کے کیسز کو سرکاری اعداد میں نہ ملانا ایک خطرناک رجحان ہے کیونکہ وہ حقیقت کا ادھورا عکس پیش کرتا ہے اور احتیاطی اقدامات کو متاثر کرتا ہے، انتظامی سطح پر کنٹرول اور نگرانی کے لئے فعال کنٹرول روم قائم کیا گیا ہے لیکن یونین کونسل اور اضلاع کی سطح پر موثر اور فوری ردعمل فراہم سامنے نہیں آرہا ہے، پاکستان میڈیکل ایسوسی ایشن نے حکومتِ سندھ سے کراچی اور حیدرآباد میں ڈینگی بخار کے کیسز میں خطرناک اضافہ ہونے پر ایمرجنسی نافذ کرنے کا مطالبہ کر دیا ہے، پی ایم اے کے مطابق ڈینگی بخار کے کیسز میں غیر معمولی اضافہ ناکارہ بلدیاتی نظام، صفائی کی ناقص صورتحال اور مچھر مار مہم کی کمی کی وجہ سے ہوا ہے، تنظیم نے کہا کہ یہ قدرتی وبا نہیں بلکہ انسانی غفلت سے پیدا ہونے والا بحران ہے، محکمہ صحت سندھ کے تازہ اعداد و شمار کے مطابق اس سال صوبے بھر میں 11,763 ڈینگو کیسز رپورٹ ہو چکے ہیں، جن میں سے 6,199 کیسز صرف رواں ماہ سامنے آئے، رپورٹ کے مطابق اس وقت کراچی کے مختلف سرکاری و نجی اسپتالوں میں 147 مریض جبکہ حیدرآباد میں 203 مریض زیرِ علاج ہیں، پی ایم اے نے صوبائی حکومت سے مطالبہ کیا ہے کہ متاثرہ اضلاع میں فوری طور پر ویکٹر کنٹرول مہم شروع کی جائے، کھڑے پانی، نالیوں اور کچرے کے ڈھیروں کی صفائی یقینی بنائی جائے اور ڈینگو کنٹرول پروگرام کا آزادانہ آڈٹ کرایا جائے۔
ڈینگی وباء کے خطرے کو کم کرنے کیلئے عوام کی مدد کی ضرورت پڑے گی، اس کیلئے سندھ حکومت آگاہی مہم چلائے پاکستان کے روایتی میڈیا عوام میں پزیدائی کھو چکے ہیں لہذا یہ کام یونین کونسل کی سطح پر کئے جائیں اور اس کیلئے رضاکار فورس اور اسکاؤٹس کی مدد حاصل کی جائے، ماہرینِ صحت کے مطابق اگر فوری اقدامات نہ کیے گئے تو ڈینگی کا پھیلاؤ مزید بڑھ سکتا ہے اور کراچی و حیدرآباد میں یہ بحران صحت عامہ کیلئے سنگین خطرہ بن جائے گا۔