پاکستان میں رواں مالی سال مہنگائی خطے میں سب سے زیادہ معاشی نمو کم رہےگی

ایشیائی ترقیاتی بینک (اے ڈی بی) نے کہا ہے کہ پاکستان میں رواں مالی سال 2023-2024 کے دوران خطے میں مہنگائی سب سے زیادہ رہے گی جبکہ معاشی شرح نمو سب سے کم رہنے کا قوی امکان ہے، ایشیائی ترقیاتی بینک نے ڈیولپمنٹ آوٹ لک رپورٹ جاری کردی، رپورٹ میں پاکستان میں رواں مالی سال معاشی شرح نمو 1.9 فیصد رہنے کا تخمینہ لگایا گیا، اے ڈی بی نے پاکستان میں رواں مالی سال اوسط مہنگائی 25 فیصد رہنے کی پیشگوئی بھی کی ہے، اس کے علاوہ رپورٹ میں پڑوسی ملک بھارت میں رواں مالی سال مہنگائی صرف 4.6 فیصد جبکہ بنگلہ دیش میں 8.4 اور بھوٹان میں مہنگائی 4.5 فیصد رہنے کا امکان ظاہر کیا گیا ہے، رپورٹ کے مطابق رواں مالی سال مالدیپ میں مہنگائی 3.2، نیپال میں 6.5 اور سری لنکا میں مہنگائی 7.5 فیصد رہنے کی توقع ہے، رپورٹ میں بتایا گیا ہے کہ رواں مالی سال بھارت میں معاشی شرح نمو 7 فیصد، بنگلہ دیش میں معاشی شرح نمو 6.1 فیصد رہنے کا امکان ہے جبکہ پاکستان کی معاشی شرح نمو انڈونیشیا، ملایشیا اور فلپائن سے کم رہنے کا تخمینہ لگایا گیا ہے۔

ڈیولپمنٹ آوٹ لک رپورٹ کے مطابق سنگا پور ،تھائی لینڈ، ویت نام سے بھی پاکستان کی معاشی شرح نمو کم رہنے کا تخمینہ لگایا گیا ہے، اس کے علاوہ رواں مالی سال سری لنکا کی معاشی شرح نمو پاکستان کے برابر یعنی 1.9 فیصد رہنے کا امکان ہے، اے ڈی بی نے بتایا کہ آئندہ برس پاکستان کی معاشی شرح نمو 2.8 فیصد تک رہنے کا امکان ہے اگر پاکستان میں سیاسی استحکام رہا، آئندہ برس پاکستان میں مہنگائی کم ہو کر 15 فیصد تک رہنے کی بھی توقع ہے بشرطہ کہ پاکستان میں سیاسی استحکام رہے، رپورٹ میں کہا گیا ہے کہ پاکستان میں معاشی اصلاحات کے ابھی تک نتائج سامنے آسکے ہیں ، معاشی استحکام کے لئے اصلاحات پر عملدرآمد نا گزیر ہے، پاکستان کی معیشت میں بتدریج روبہ زوال ہے، زراعت اور مینوفیکچرنگ کے شعبے کی پیداوار بڑھ رہی ہے۔