حافظ نعیم الرحمان کو پاکستان جماعت اسلامی کا امیر منتخب کرلیا گیا ہے، حافظ نعیم الرحمان جماعت اسلامی پاکستان کے چھٹے امیر منتخب ہوئے ہیں، وہ 2029ء تک جماعت اسلامی پاکستان کے امیر رہیں گے، اس سے قبل حافظ نعیم الرحمن امیر جماعت اسلامی کراچی کے طور پر فرائض انجام دے رہے تھے، امیر کے انتخاب کے لئے صدر انتخابی کمیشن نے رہنمائی کے لئے 3 ناموں کا اعلان کیا تھا، جن میں سراج الحق، لیاقت بلوچ، حافظ نعیم الرحمٰن شامل تھے، یاد رہے کہ چند ہفتوں قبل سراج الحق نے انتخابات میں ناکامی تسلیم کرتے ہوئے امیر جماعت اسلامی عہدے سے استعفیٰ دیا تھا تاہم اسے قبول نہیں کیا گیا اور انہیں عہدے پر برقرار رکھا تھا، جماعت اسلامی کے مرکز منصورہ لاہور میں پریس کانفرنس کرتے ہوئے صدر الیکشن کمیشن جماعت اسلامی اور نائب امیر راشد نسیم نے ان کی کامیابی کا اعلان کرتے ہوئے کہا کہ حافظ نعیم الرحمن جماعت اسلامی کے نئے امیر ہوں گے۔
جماعت اسلامی قیصر شریف کا کہنا تھا کہ جماعت اسلامی مکمل جمہوری جماعت ہے، امیر جماعت اسلامی کا ہر پانچ سال بعد انتخاب دستوی تقاضا ہے، دستور کے مطابق ہر سطح پر باقاعدگی سے انتخابات ہوتے ہیں نئے امیر جماعت اسلامی کی مدت 2024 تا اپریل 2029 تک ہوگی، ان کا کہنا تھا کہ امیر جماعت اسلامی کا انتخاب آئندہ پانچ سال کے لئے کیا جاتا ہے، جماعت اسلامی کسی فرد یا خاندان کی نہیں بلکہ ہر رکن اور کارکن کی ہے، قیصر شریف نے بتایا تھا کہ ملک بھر سے 46 ہزار اراکین نے اپنا ووٹ خفیہ بیلٹ کے ذریعے کاسٹ کیا، امیر جماعت کے لئے تین ناموں میں سراج الحق، لیاقت بلوچ، حافظ نعیم الرحمٰن شامل ہیں، ان کا کہنا تھا کہ اراکین جماعت ان تین کے علاوہ بھی کسی کو ووٹ کاسٹ کر سکتے تھے، امیر جماعت اسلامی سراج الحق اپنی دوسری مدت امارات 8 اپریل کو پوری کر رہے ہیں، قیصر شریف نے بتایا کہ سراج الحق جماعت اسلامی کے پانچویں امیر تھے، ان سے قبل منور حسن، قاضی حسین احمد، میاں طفیل اور مولانا مودودی امیر جماعت اسلامی رہ چکے ہیں۔