مشرق وسطیٰ میں امن، استحکام اور خوشحالی کیلئے صدر ٹرمپ ایران سے ایٹمی معاہدہ کرنا چاہتے ہیں

امریکہ کے خصوصی صدارتی ایلچی اسٹیو وٹ کوف نے سوشل میڈیا سائٹ ایکس پر ایران کے ساتھ جاری مذاکرات کے بارے میں اپنے موقف کا خاکہ پیش کرتے ہوئے کہا کہ ایران کے ساتھ کسی بھی حتمی معاہدہ مشرق وسطیٰ میں امن، استحکام اور خوشحالی کے لئے صدر ٹرمپ کے وژن کے مطابق ہوگا، انہوں نے کہا کہ ایران کے ساتھ معاہدہ صرف اس صورت میں مکمل ہو گا جب ایران اپنے جوہری افزودگی اور ہتھیار بنانے کا پروگرام کو روکنے پر آمادگی کا اظہار کرئے،دنیا کیلئے یہ ضروری ہے کہ ہم ایک سخت، منصفانہ معاہدہ کریں جو برقرار رہے گا اور صدر ٹرمپ نے مجھے یہی کام سونپا ہے، امریکہ اور ایران نے حال ہی میں مسقط، عمان میں بالواسطہ مذاکرات مکمل کیے ہیں اور اگلے ہفتے مذاکرات جاری رکھنے پر اتفاق کیا ہے، عمان کی ثالثی میں ہونے والی بات چیت کا مقصد دونوں ممالک کے درمیان اہم مسائل بالخصوص ایران کے جوہری پروگرام اور اس کی وسیع تر علاقائی سرگرمیوں کے حوالے سے بات چیت کرنا تھا، مذاکرات کو تعمیری ماحول اور باہمی احترام پر مبنی قرار دیا گیا۔
امریکہ کے خصوصی ایلچی سٹیو وٹ کوف اور ایرانی وزیر خارجہ عباس عراقچی نے اپنے اپنے وفود کی قیادت کی، عمانی وزیر خارجہ بدر بن حمد البوسیدی چیف ثالث کا کر دار ادا کررہے ہیں،امریکی اور ایران کے وفود نے بالواسطہ طور پر بات چیت کی جو الگ الگ کمروں میں بیٹھے تھے،ملاقات کے بعد وائٹ ہاؤس نے ایک بیان جاری کرتے ہوئے کہا کہ بات چیت مثبت اور تعمیری رہی اور اس بات کی تصدیق کی کہ دونوں فریقین نے اگلے ہفتے کو دوبارہ ملاقات پر اتفاق کیا، مذاکرات سے قبل صدر ٹرمپ نے تہران کو خبردار کیا تھا کہ اگر معاہدہ نہ ہوا تو فوجی کارروائی کی جائے گی، ٹرمپ نے کہا کہ میں چاہتا ہوں کہ ایران کے پاس ایٹمی ہتھیار نہ ہوں۔ میں چاہتا ہوں کہ ایران ایک شاندار، عظیم، خوش حال ملک ہولیکن ان کے پاس جوہری ہتھیار نہیں ہو نا چاہیئے، امریکی وزیر خارجہ مارکو روبیو نے ایران کو جوہری ہتھیاروں کی تیاری سے روکنے کی اہمیت پر روشنی ڈالتے ہوئے کہا ہےکہ ہم بہت واضح ہیں کہ ایران کبھی بھی جوہری ہتھیار حاصل نہیں کرے گا۔