مینار پاکستان میں پی ٹی آئی کے احتجاج کے پیش نظر مینار پاکستان اور شہر میں داخلے تمام راستوں کو کنیٹینرز رکھ کر مکمل طور پر سیل کردیا گیا ہے جب کہ لاہور میں احتجاج روکنے کیلئے مینار پاکستان پرپانی چھوڑ دیا گیا، لاہور کے تمام داخلی اور خارجی راستے درجنوں کنٹینرز لگا کر بند کردیئے گئے ہیں، بابو سابو اور ٹھوکر نیاز بیگ سمیت شاہدرہ پر کنٹینرز لگائے گئے ہیں جب کہ موٹروے کو بھی ٹریفک کے لئے مکمل بند کردیا گیا ہے، جاتی امرا روڈ پر شریف فیملی کی رہائش گاہ کو جانے والے راستے بھی بند کر دیئے گئے ہیں اور اڈا پلاٹ پر مختلف مقامات پر دو سو سے زائد پولیس اہلکار تعینات کیے گئے ہیں جب کہ موجود مسلم لیگ (ن) کے آفس ماڈل ٹاون جانے والے راستے بھی بند کردیئے گئے، حکومت نے لاہور، راولپنڈی اور اٹک میں رینجرز کی 9 کمپنیوں کو ہفتے کو ڈیوٹی کے لئے بلایا اور اب صوبائی دارالحکومت میں فوج کو بھی طلب کرلیا گیا ہے، اسلام آباد کے بعد پنجاب میں بھی امن و امان کی صورتحال کے پیش نظر فوج طلب کرلی گئی جس کا نوٹی فکیشن بھی جاری کردیا گیا ہے، پی ٹی آئی پنجاب کے قائم مقام صدر حماد اظہر نے ایکس پر ایک پوسٹ میں امید ظاہر کی کہ لاہوری بڑی تعداد میں باہر آئیں گے اور موجودہ حکومت کے مبینہ فاشزم کو مسترد کر دیں گے۔
پنجاب کی وزارت داخلہ کی جانب سے جاری نوٹی فکیشن کے مطابق پنجاب کی حدود میں آنے والے ائیر پورٹس، ائیر بیسسز اور دیگر اہم مقامات پر فوج تعینات ہوگی جب کہ امن قائم رکھنے کے لئے فوج اینٹی رائٹس اختیارات استعمال کرنے کی مجاز ہوگی، محکمہ داخلہ پنجاب کی جانب سے مزید کہا گیا کہ فوجی اہلکاروں کی جانب سے شر پسند عناصر کو وارننگ دینے کے لئے ہوائی فائرنگ بھی کی جائے گی، یاد رہے کہ پاکستان تحریک انصاف کی جانب سے ہفتے کی دوپہر مینار پاکستان پر احتجاج کا اعلان کیا گیا ہے، مینار پاکستان پر احتجاج کو یقینی بنانے کے لئے پی ٹی آئی کی مرکزی قیادت نے اپنے لاہور چیپٹر کو ہدایت کی تھی کہ وہ گرفتاری سے بچنے کے لئے جمعہ کو اسلام آباد ڈی چوک کے احتجاج میں شرکت کے لئے نہ آئیں، لاہور میں پی ٹی آئی کے احتجاج کی کال کے بعد پولیس متحرک ہوگئی ہے، کارکنوں کو روکنے کے لئے پولیس نے پلان تیار کرلیا اور اس سلسلے میں سینکڑوں گرفتاریاں بھی کی گئی ہیں، لاہور میں 8 اکتوبر تک دفعہ 144 نافذ رہے گی، میانوالی 7 اکتوبر، اور راولپنڈی، سرگودھا اور اٹک میں 6 اکتوبر تک برقرار رہے گی جب کہ راولپنڈی اور اٹک میں جمعہ اور ہفتہ کو ڈبل سواری پر پابندی عائد کردی گئی۔