عرب دنیا کے وزرائے خارجہ نے غزہ سے فلسطینیوں کی منتقلی کے امریکی صدر ڈونلڈ ٹرمپ کے خیال کو یکسر مسترد کردیا، امریکی صدر ٹرمپ نے گزشتہ ہفتے فلسطینیوں کو غزہ سے اردن اور مصر منتقل کیے جانے کی تجویز پیش کی تھی، قاہرہ اجلاس کے بعد ایک مشترکہ بیان میں مصر، اردن، سعودی عرب قطر، متحدہ عرب امارات، فلسطینی اتھارٹی اور عرب لیگ کے وزرائے خارجہ اور حکام نے کہا کہ اس طرح کے اقدام سے خطے میں استحکام کو خطرہ لاحق ہوجائیگا، تنازعات پھیل جائیں گے اور امن کے امکانات کو نقصان پہنچے گا، سعودی نیوز ایجنسی کے مطابق مصری دارالحکومت قاہرہ میں ہونے والے عرب مشاورتی اجلاس میں سعودی عرب کے وفد کی قیادت وزیر خارجہ شہزادہ فیصل بن فرحان نے کی۔
اجلاس میں غزہ کی پٹی میں جنگ بندی اور یرغمالیوں کے تبادلے کا خیر مقدم کیا گیا، فلسطینی اتھارٹی کو مقبوضہ علاقوں میں فلسطینی عوام کی سلامتی، خطے کے استحکام کے حوالے سے جامع انداز میں کام کرنے کے طریقہ کار پر تبادلہ خیال کیا گیا، سعودی عرب اور فرانس کی سربراہی میں جون 2025 میں مسئلہ فلسطین اور دو ریاستی حل کے لئے ہونے والی بین الاقوامی کانفرنس میں شرکت کو یقینی بنانے پر بھی بات چیت ہوئی، مشاورتی اجلاس میں تنازعہ فلسطین کی تازہ ترین صورتحال اور جنگ بندی کو پائیدار بنانے کے علاوہ محفوظ طریقے سے پناہ گزینوں کی واپسی کے ساتھ امدادی کاموں کو تیز کرنے پر زور دیا گیا۔
مصر کی دعوت پر وزارئے خارجہ کے اجلاس میں فلسطین کے حوالے سے سات نکاتی ایجنڈے پر اتفاق کیا گیا، اجلاس میں جنگ بندی کے حوالے سے مصر اور قطر کی کوششوں کو سراہا گیا۔ امریکہ کے اہم کردار کی بھی تعریف کی گئی، امریکی صدر ڈونلڈ ٹرمپ کی انتظامیہ کے اشتراک سے دو ریاستی حل اور خطے کو تمام تنازعات سے صاف کرنے کے حوالے سے بھی امکانات کا جائزہ لیا گیا۔
عرب وزارتی اجلاس میں مستقل بنیادوں پر جنگ بندی کی اہمیت پر زوردیتے ہوئے غزہ پٹی میں امدادی کی بھرپورطریقے سے ترسیل کو یقینی بنانے کے لیے تمام رکاوٹوں کو فوری ختم کرنے کرنے کا مطالبہ کیا گیا، غزہ پٹی سے اسرائیلی فورسز کے مکمل انخلا اور غزہ پٹی کو تقسیم کرنے کی کسی بھی کوشش کی نفی کرتے ہوئے اسے مکمل طورپر مسترد کیا گیا، اس بات پر زور دیا گیا کہ فلسطینی اتھارٹی کو مکمل ذمہ داریاں سنبھالنے کی اجازت دی جائے، اقوام متحدہ کی ریلیف اینڈ ورکس ایجنسی برائے فلسطینی پناہ گزین اونروا کے کردار کو اہم قرار دیتے ہوئے اسے نظر انداز کرنے یا محدود کرنے کی کسی بھی کوشش کو واضح طورپر مسترد کیا گیا۔
اجلاس میں بین الاقوامی قانون کے تحت فلسطینیوں کے جائز حقوق کی پاسداری کے لئے ان کے ساتھ مکمل یکجہتی و تعاون کی یقین دہانی کرائی گئی، شرکا نے بین الاقوامی برادری خاص کر علاقائی طاقتوں اور اقوام متحدہ کی سلامتی کونسل پر زوردیا کہ وہ مسئلے کے دوریاستی حل کے نفاذ کو ہر صورت میں یقینی بنائیں تاکہ مشرق وسطی میں کسی بھی طرح کی کشیدگی کو جڑ سے ختم کرتے ہوئے فلسطینی تنازعہ کے منصفانہ تک پہنچا جاسکے۔