اسرائیلی ایٹمی پروگرام کی خفیہ دستاویزات کا حصّول، ایران کا انٹیلی جنس آپریشن کامیابی سے ہمکنار !

تحریر: محمد رضا سید
اسرائیلی قیادت کے پاؤں تلے زمین نکل گئی ہے جب ایران نےتل ابیب کی خفیہ ایٹمی سرگرمیوں سے متعلق اہم دستاویزات، ویڈیوز اور تصاویر پر مبنی اہم ثبوتوں کو حاصل کرنے کا دعویٰ کیا،اسرائیلی میڈیا نے ان خبروں کی تصدیق کی ہے کہ ایران نے اسرائیل کی جوہری تنصیبات اور فوجی منصوبوں سے متعلق تزویراتی اور حساس دستاویزات کا ایک بڑا ذخیرہ اٹیلی جنس کارروائی کے نتیجے میں حاصل کیا ہے، جس سے اس بات کی نشاندہی ہوتی ہے کہ تل ابیب ناقابل تسخیر نہیں ہے، اسرائیل کے ناقابل تسخیر ہونے کا تاثر کئی دہائیوں سے مغربی سرمایہ دارانہ ذہنیت اُبھار رکھا تھا،جس نے مشرق وسطیٰ میں خوف پیدا کرکےنہ صرف عربوں کو اسلحہ فروخت کیا بلکہ تیل اور اس سے کمائی گئی دولت پر اپنا کنٹرول رکھا، یہ امام خمینیؒ تھے جو امریکہ کیساتھ ساتھ اسرائیل کا بُت توڑنے میں کامیاب ہوئےاور اپنی زندگی میں ہی اسرائیل کی متعدد مرتبہ ناک رگڑی اور اسرائیل کے خلاف حقیقی مزاحمت کا دور شروع کیا۔
دنیا بھر میں اسرائیل کی انٹیلی جنس ایجنسیوں کی دھاگ تھی، موساد کی دہشت گردی پر مبنی کارروائیوں سے عرب بادشاہتیں بھی خوفذدہ رہا کرتی تھیں لیکن ایران کی انٹیلی جنس کمیونٹی نے اسرائیلی حکومت سے اسٹریٹجک اور حساس دستاویزات کا ایک بڑا خفیہ ذخیرہ حاصل کرکے تل ابیب کی نام نہاد انٹیلی جنس استعداد کا پول بھی کھول دیا ہے، ایران کو حاصل ہونے والی خفیہ معلومات اس وجہ سے اہم ہیں کہ اسرائیل کا ایٹمی پروگرام جو دنیا کی آنکھوں سے اُجھل رکھا جارہا تھااور امریکہ جو پولیس مین بن کر ایشیائی ملکوں کو جوہری ٹیکنالوجی سے دور رکھنے کیلئے ناجائز دباؤ ڈالتا رہا ہے، اُس نے اسرائیل کے ایٹمی پروگرام پر چُپ سادھ رکھی ، ایران کو جوخفیہ معلومات حاصل ہوئیں ہیں اُن سے معلوم ہوا ہے کہ اسرائیل کا ایٹمی پروگرام کا ڈھانچہ مذموم مقاصد کیلئے تیار کیا گیا ہے اور ایٹمی ہتھیار بنانے کی صلاحیت کا حامل ہے، ایران کی انٹیلی جنس کمیونٹی نے تل ابیب کے جوہری منصوبوں اور تنصیبات سے متعلق ہزاروں خفیہ ریکارڈ حاصل کئے ہیں ممکن ہے کہ تہران اس ریکارڈ کو جاری کرئے، اس معاملے سے واقف ذرائع نے اسلامی جمہوریہ ایران براڈکاسٹنگ(آئی آر آئی بی) کو بتایا کہ تل ابیب کی کاؤنٹرانٹیلی جنس کی ناکامی قابض اسرائیلی حکومت کیلئے سب سے بڑا دھچکا ہے، ذرائع کا کہنا ہے کہ اگرچہ غاصب اسرائیل سے حاصل کردہ خفیہ دستاویزات حاصل کرنے کاآپریشن کچھ عرصہ قبل انجام پایالیکن اس حوالے سے خبروں کو باہر نکلنے سے روکنے کیلئے بھرپور اقدامات کئے گئے، تاکہ حساس ریکارڈ کی جو بڑی مقدار میں تھا اسے بحفاظت ایران پہنچا جاسکے لہذا جب تمام حساس انٹیلی جنس معلومات تہران کو موصول ہوگئیں تو ایران کے سرکاری میڈیا کے ذریعے خبر کو بے نقاب کردیا گیا، جس نے اسرائیل کی چیخیں نکال دی ہیں، تہران نے سرکاری طور پر اسرائیل کے ایٹمی معلومات کے متعلق تفصیلات جاری نہیں کی ہیں تاہم تہران میں موجود سیاسی مبصرین کا کہنا ہے کہ ایران نے اسرائیل کے خلاف ایک اہم معرکہ جیت لیا ہے، سیاسی مبصر مہدی روغنی کا کہنا ہے کہ اب اگر اسرائیل نے ایران کے ایٹمی پروگرام کو نقصان پہنچانے کی کوشش کی تو اسرائیل کو اسکا بھرپور جواب ملے گا، مہدی روغنی نے کہا ایران کی انٹیلی جنس کمیونٹی کی شاندار کامیابی کے بعد ایران کے خلاف اسرائیل کی کسی مذموم مہم جوئی کے راستے بند ہوچکے ہیں، ایران کے سرکاری میڈیا کو آفیشلی بتایا گیا ہے کہ خفیہ اور اہم دستاویزات کی کثرت جس میں تصاویر اور ویڈیوز بھی شامل ہیں ان کا جائزہ لینے میں کافی وقت صرف ہوا ہے۔
ایران نے اسرائیل کے خلاف اہم انٹیلی جنس کامیابی کا انکشاف اُس وقت کیا جب اسرائیلی حکام نے سکیورٹی بریچ ہونےکے شبے میں دو افراد کی گرفتاری کے اعلان کیا، جو اسرائیل میں ایران کے انٹیلی جنس نیٹ ورک کو چلا رہے تھے، 20 مئی 2025ء کو اسرائیلی پولیس اور انٹیلی جنس ایجنسی شن بیٹ کی طرف سے جاری کردہ مشترکہ بیان میں کہا گیا تھا کہ رائے میزراہی اور الموگ اتیاس کو 24 کو اپریل کے آخر میں مبینہ طور پر ایران کیلئے انٹیلی جنس اکٹھا کرنے کے مشن کے الزام میں حراست میں لیا گیا تھا، اسرائیلی حکام کا دعویٰ ہے کہ ان دونوں افراد نےجنوبی مقبوضہ علاقوں میں کفار احم کی کمیونٹی میں اسرائیلی وزیر برائے عسکری امور اسرائیل کاٹز کا پیچھا کیا اور حساس معلومات خریدیں، ایرانی ذرائع نے سرکاری میڈیا آئی آر آئی بی کو بتایا کہ ان دونوں اسرائیلی شہریوں کی گرفتاری اُس وقت ہوئی جب حساس دستاویزات مقبوضہ علاقوں سے باہر لے جانے میں کامیابی حاصل ہوچکی تھی، تہران میں بعض ذرائع نے دعویٰ کیا ہے کہ دستاویزات سے معلوم ہورہا ہے کہ اسرائیل غیرقانونی ایٹمی پروگرام چلارہا ہے، خفیہ معلومات منظر عام پر آنے کے بعد اسرائیل پر اُس کے ایٹمی پروگرام کے حوالے سے عالمی برادری کی توجہ مرکوز ہوسکے گی، دریں اثنا خلیج تعاون کونسل سمیت مصر نے اسرائیل کے ایٹمی پروگرام کیلئے مضبوط چیک اینڈ بیلنس کا نظام قائم کرنے کی ضرورت کو اُجاگر کیا ہے، سعودی عرب سمیت عرب لیگ کے متعدد ملکوں نے مطالبہ کیا ہے کہ مشرق وسطیٰ کو ایٹمی ہتھیاروں سے پاک رکھنے کے اقدامات کو اسرائیل تک توسیع دی جائے۔