پاکستان میں خوردنی تیل اور گھی پر عوام سے فی کلو 175 روپے اضافی وصولی خلاف تحقیقات کا امکان

پاکستان میں خوردنی تیل اور گھی پر عوام سے فی کلو 175 روپے تک اضافی وصولی کا انکشاف ہوا ہے، وفاقی حکومت نے معاملے کا نوٹس لے لیا، اقتصادی رابطہ کمیٹی کے اجلاس میں مسابقتی کمیشن کے ذریعے گھی اور کوکنگ آئل انڈسٹری میں کارٹل کی تحقیقات شروع کرائے جانے کا امکان ہے، عالمی مارکیٹ میں کوکنگ آئل کی قیمتوں میں 25 فیصد تک کمی ہوئی، عالمی مارکیٹ میں کوکنگ آئل اور گھی کی قیمتوں میں 25 فیصد تک کمی کے باوجود پاکستان میں اضافہ ہوا، ذرائع کے مطابق عالمی مارکیٹ میں قیمتوں میں کمی کے باوجود پاکستانی عوام سے 150 سے 175 روپے فی کلو اضافی وصول کیے جارہے ہیں، اقتصادی رابطہ کمیٹی (ای سی سی) کے اجلاس میں مقامی مارکیٹ میں کوکنگ آئل اور گھی کی قیمتوں میں اضافے پر غور جاری ہے، ای سی سی معاملے پر غور کے بعد اہم فیصلے کرے گی، اجلاس میں مسابقتی کمیشن کے ذریعے گھی اور کوکنگ آئل انڈسٹری میں کارٹل کی تحقیقات شروع کرائے کا امکان ہے، دوسری طرف ایف بی آر نے گزشتہ دو مالی سالوں میں جعلی اور فلائنگ انوائسز کے ذریعے 22 کھرب روپے سے زائد مالیت کی ٹیکس چوری کا انکشاف کیا ہے، پاکستانی سینیٹ کی قائمہ کمیٹی برائے خزانہ و ریونیو کے سامنے بیان دیتے ہوئے فیڈرل بورڈ آف ریونیو (ایف بی آر) کے رکن حامد عتیق سرور نے کہا کہ گزشتہ سال 873 ارب روپے سے زائد کی جعلی اور فلائنگ انوائسز کا انکشاف ہوا تھا جوکہ ایک سال قبل 13 کھرب 70 ارب روپے تھا، جو دو سالوں میں مجموعی طور پر ساڑھے 22 کھرب روپے تک پہنچ گیا، انہوں نے فنانس بل 26-2025 کے تحت ٹیکس قوانین میں نرمی کے لیے کاروباری برادری کے مطالبات کے جواب میں کہا کہ یہ کسٹم کی جانب سے جمع کیے جانے والے کُل ٹیکس کا تقریباً ایک تہائی ہے۔
حامد عتیق سرور نے کہا کہ اس طرح کی بڑے پیمانے پر محصولات کے نقصان کو جاری نہیں رہنے دیا جاسکتا جبکہ وہ ٹیکس حکام جو اپنے اختیارات کا غلط استعمال کر رہے تھے، ان کے خلاف کارروائی کی گئی ہے، انہوں نے کہا کہ وفاقی یا صوبائی سطح پر کسی اور محکمے نے ایف بی آر کی طرح اپنی افرادی قوت کے خلاف تعزیری کارروائی نہیں کی، کمیٹی نے بجٹ 26-2025 میں متعدد بے ضابطگیوں پر وسیع بحث کی جس میں چیمبرز آف کامرس کے اراکین کی بریفنگ بھی شامل تھی، جس میں صرف شک کی بنیاد پر ایف بی آر کو گرفتاری کے اختیارات دینے والی شقوں پر خصوصی توجہ دی گئی، وزیر مملکت برائے خزانہ و محصولات بلال اظہر کیانی نے کہا کہ وزیراعظم نے چیمبرز کی شکایات کے ازالے کیلئے ایک کمیٹی تشکیل دی ہے، بلال اظہر کیانی نے کہا کہ تاجر برادری کے ساتھ تفصیلی بات چیت کے بعد چیمبرز کی طرف سے نمایاں کردہ خامیوں کو واضح کرنے کے لیے جلد ہی ایک سرکلر جاری کیا جائے گا، اجلاس کی صدارت کرنے والے سینیٹر سلیم مانڈوی والا اور دیگر اراکین نے وزیر مملکت سے اتفاق کیا کہ عالمی مالیاتی فنڈ (آئی ایم ایف) کی رضامندی سے فنانس بل کی منظوری کے صرف ایک ماہ بعد اس میں ترامیم کی کوشش کرنا اچھا نہیں ہوگا، ایف بی آر کے ایک اور رکن ڈاکٹر نجیب نے کہا کہ حکومت نے اتحادی شراکت داروں، ارکان پارلیمنٹ اور دیگر کی جانب سے مزاحمت کے بعد ٹیکس دہندگان کے اختیارات کو کم کر دیا تھا اور اس فنانس بل میں بہت فرق تھا جو پہلے پارلیمنٹ میں پیش کیا گیا تھا اور بعد میں پارلیمنٹ سے منظور کیا گیا ہے۔