امریکا اور اس کے حلیف ممالک کی انٹیلی جنس ایجنسیوں کا خیال ہے کہ ایران یا اس کے اتحادی مستقبل قریب میں اسرائیل پر بڑے میزائل یا ڈرون حملے کرسکتے ہیں اور ایسا ہونے سے گزشتہ 6 ماہ سے جاری جنگ مزید پھیل جانے کے خدشات ہیں، بلومبرگ کی رپورٹ کے مطابق انٹیلی جنس کی معلومات رکھنے والے ذرائع کا کہنا ہے کہ یہ حملہ آنے والے چند دنوں میں ہدف کو ٹھیک نشانہ والے میزائلوں کے ذریعے سے کیا جاسکتا ہے، امریکا کے مقتدر قوتوں کا یہ سمجھنا ہے کہ ایران یا اس کے اتحادی ایسے کسی حملے میں اسرائیل میں واقع عسکری یا حکومتی اہداف کو درست طریقے سے نشانہ بنانے کی صلاحیت رکھتا ہے، امریکی اور اسرائیلی انٹیلی جنس کے مطابق سوال یہ نہیں ہے کہ حملہ ہوگا بلکہ سوال صرف یہ ہے کہ یہ کب ہوگا؟ جس کی وجہ سے اسرائیلی حکومت اور اس ملک کے شہری نفسیاتی دباؤ کا شکار ہیں، ایک اسرائیلی شہری نے سوشل میڈیا پر بتایا کہ وہ اور اُس کے خاندان کے چند افراد شدید نفسیاتی دباؤ کا شکار ہوئے اور انہیں متعلقہ شعبے کے ڈاکٹرز سے رجوع کرنا پڑا ہے، واضح رہے کہ ایران نے شام کے دارالحکومت دمشق میں یکم اپریل کو ایک سفارتی کمپاؤنڈ پر کیے گئے حملے کا بدلہ لینے کے لئے اسرائیل کو نشانہ بنانے کا اعلان کیا ہے، جس میں ایران کی قدس فورس کے اعلیٰ فوجی اہلکار شہید ہوئے تھے تاہم اسرائیل نے اب تک اس حملے کی ذمہ داری قبول نہیں کی۔
ذرائع نے بتایا کہ اسرائیل کے مغربی اتحادیوں کو بتایا گیا ہے کہ اسرائیلی حکومت اور فوجی تنصیبات کو نشانہ بنانے کی تہران سے رپورٹس موصول ہورہی ہیں لیکن شہری تنصیبات کو نشانہ بنانے کی توقع نہیں، ذرائع کا کہنا تھا کہ امریکی حکام انٹیلی جنس تشخیص کی منصوبہ بندی اور اشتراک میں اسرائیل کی مدد کر رہے ہیں، اسرائیل نے اتحادیوں سے کہا ہے کہ وہ غزہ میں رفح میں حماس کے خلاف ایک اور زمینی کارروائی شروع کرنے سے پہلے اس حملے کے ہونے کا انتظار کر رہا ہے، حالانکہ یہ واضح نہیں ہے کہ یہ کارروائی کتنی جلد شروع ہو سکتی ہے، ذرائع نے مزید کہا کہ امریکی اور مغربی انٹیلی جنس اس بات کی نشاندہی کرتی ہیں کہ ایران یا اس کے اتحادی اسرائیل کے شمال سے حملہ نہیں کریں گے جہاں لبنان میں تہران کی اتحادی حزب اللہ کا کنٹرول ہے، اسرائیلی حکام اتحادیوں کے مؤقف سے متفق ہیں، انہوں نے ایران کو کھلے عام دھمکی بھی دی ہے کہ اگر انہوں نے اسرائیلی سرزمین پر حملہ کیا تو اسرائیل ایرانی سرزمین پر حملہ کرے گا، یاد رہے ایران کے رہبر اعلیٰ آیت اللہ العظمیٰ الامام سید علی خامنہ ای نے عید الفطر کے موقع پر تہران میں دسیوں لاکھ کے اجتماع سے خطاب کرتے ہوئے کہا کہ اسرائیل نے بار بار انتباہ کے باوجود ایرانی سفارت خانے پر میزائل حملہ کرکے وہ غلطی کی ہے جو ناقابل معافی ہے، اسرائیلی حکومت کو دنیا کے کسی حصّے میں چین سے نہیں رہنے دینگے۔
1 تبصرہ
اسرائیل پت حملہ ہوگا جس سے اسرائیل ککے خاتمے کاوقت قریب آجائے گا