اسٹیٹ بینک آف پاکستان کے مطابق زرمبادلہ کے سرکاری ذخائر میں 6 کروڑ 30 لاکھ ڈالر کی کمی آئی ہے، مرکزی بینک کے اعلامیہ کے مطابق سرکاری ذخائر 7 ارب 94 کروڑ 96 لاکھ ڈالر کی سطح پر آگئے جبکہ 23 فروری کو ہفتہ کے اختتام پر مجموعی ذخائر کی مالیت 13 ارب 3 کروڑ 85 لاکھ ڈالر ریکارڈ کی گئی، علاوہ ازیں کمرشل بینکوں کے پاس 5 ارب 8 کروڑ 89 لاکھ ڈالر کے ذخائر موجود ہیں، دوسری طرف پاکستان کی نگران حکومت نے جاتے جاتے آئندہ 15روز کے لئے ایک بار پھر پیٹرول کی فی لیٹر قیمت میں اضافہ کر دیا ہے، وزارت خزانہ کی جانب سے جمعرات اور جمعے کی درمیانی شب جاری ہونے والے بیان کے مطابق پیٹرول کی فی لیٹر قیمت میں مزید چار روپے 13 پیسے کا اضافہ کر دیا گیا ہے۔
اس اصافے کے بعد پیٹرول کی فی لیٹر قیمت 279 روپے 75 پیسے ہو گئی ہے، نوٹیفیکیشن کے مطابق ہائی سپیڈ ڈیزل کی قیمت میں کوئی اضافہ نہیں کیا گیا ہے یعنی ہائی سپیڈ ڈیزل کی فی لیٹر قیمت 287 روپے 33 پیسے ہی برقرار رہی گی، ان نئی قیمتوں کا اطلاق رات 12 بجے یعنی یکم مارچ سے ہوگا۔