پاکستانیوں کیلئے واشنگٹن سے بری خبر سامنے آگئی آئندہ ہفتے سے امریکہ میں داخلہ ناممکن بنا دیا جائیگا

امریکی صدر ڈونلڈ ٹرمپ کی ایک نئی سفری پابندی کے حکم کے تحت افغانستان اور پاکستان کے شہریوں کا امریکہ میں داخلہ آئندہ ہفتے سے روکا جا سکتا ہے، تین باخبر ذرائع نے برطانوی خبر رساں ادارے روئٹرز کو بتایا ہے کہ یہ اقدام حکومت کی جانب سے مختلف ممالک کے سکیورٹی اور جانچ پڑتال کے نظام کے جائزے کے بعد کیا جا رہا ہے، بااعتماد ذرائع نے بتایا کہ دیگر ممالک کو بھی اس فہرست میں شامل کیا جا سکتا ہے مگر وہ یہ نہیں جانتے کہ کون سے ممالک متاثر ہوں گے، یہ اقدام ٹرمپ کی پہلی صدارتی مدت میں سات مسلم اکثریتی ممالک پر لگائی گئی پابندی سے مشابہت رکھتا ہے، جسے کئی ترامیم کے بعد بالآخر 2018 میں امریکی سپریم کورٹ نے برقرار رکھا تھا، ٹرمپ کے جانشین، سابق صدر جو بائیڈن نے 2021 میں اس پابندی کو منسوخ کر دیا تھا اور اسے امریکہ کے قومی ضمیر پر ایک بدنما داغ قرار دیا تھا، نئی سفری پابندی کا یہ حکم ہزاروں افغان شہریوں پر اثر انداز ہو سکتا ہے، جو امریکی اسپیشل امیگرنٹ ویزا یا تارکین وطن کے طور پر امریکہ میں پناہ لینے کیلئے کلیئرنس حاصل کرچکے ہیں، ان افراد کو طالبان کے انتقامی حملوں کا خطرہ ہے کیونکہ انہوں نے امریکہ کے ساتھ 20 سالہ جنگ کے دوران کام کیا تھا، ٹرمپ نے 20 جنوری کو ایک ایگزیکٹو آرڈر جاری کیا، جس میں حکم دیا گیا کہ امریکہ میں داخلے کے خواہشمند تمام غیر ملکیوں کی سخت سکیورٹی جانچ پڑتال کی جائے تاکہ قومی سلامتی کے کسی بھی ممکنہ خطرے کا پتہ چلایا جا سکے۔
اس حکم کے تحت متعدد کابینہ اراکین کو ہدایت دی گئی کہ وہ 12 مارچ تک ایسے ممالک کی فہرست پیش کریں جہاں سے سفر کو جزوی یا مکمل طور پر معطل کیا جانا چاہیے کیونکہ ان ممالک کی جانچ اور اسکریننگ کی معلومات انتہائی ناکافی ہیں، تین ذرائع اور ایک شخص، جنہوں نے شناخت ظاہر نہ کرنے کی درخواست کی، نے کہا کہ افغانستان کو مکمل سفری پابندی کے لیے تجویز کردہ ممالک کی فہرست میں شامل کیا جائے گا، ذرائع نے مزید بتایا کہ پاکستان کو بھی اس فہرست میں شامل کرنے کی سفارش کی جائے گی، محکمہ خارجہ، محکمہ انصاف، محکمہ داخلی سلامتی اور نیشنل انٹیلیجنس کے ڈائریکٹر کا دفتر جو اس اقدام کی نگرانی کررہے ہیں نے اس حوالے سے کیے گئے تبصروں کی درخواستوں کا فوری طور پر کوئی جواب نہیں دیا، ایک ذرائع نے نشاندہی کی کہ امریکہ میں بسنے کے لئے کلیئر کیے گئے افغانوں کو پہلے ہی انتہائی سخت جانچ پڑتال سے گزرنا پڑتا ہے، جوکہ انہیں دنیا میں سب سے زیادہ سختی سے تصدیق کی گئی آبادی بناتا ہے۔
ذرائع نے کہا محکمہ خارجہ کی ری سیٹلمنٹ ٹیم ان افغانوں کے لئے سفری پابندی سے استثنیٰ حاصل کرنے کی کوشش کررہی ہے لیکن اس کے کامیاب ہونے کا امکان کم سمجھا جا رہا ہے، اس دفتر کو ہدایت اپریل تک مکمل طور پر بند کرنے کی ہدایت مل چکی، جس کی رپورٹ گذشتہ ماہ رؤئٹرز نے شائع کی تھی، افغانستان میں جہاں طالبان نے 2021 میں امریکی فوج کے انخلا کے بعد قبضہ کر لیا تھا، داعش کے علاقائی گروہ کے خلاف مسلح مزاحمت جاری ہے، دوسری جانب پاکستان بھی انتہا پسند گروہوں اور دہشت گرد حملوں کی لپیٹ میں ہے، ٹرمپ کی ہدایت اپنی دوسری مدت کے آغاز پر امیگریشن کے خلاف کریک ڈاؤن کا حصہ ہے، افغان مہاجرین کے انخلا اور آبادکاری کے سربراہ شون وان ڈائیور نے ایک بیان میں کہا کہ اگرچہ ابھی تک کوئی سرکاری اعلان نہیں ہوا، مگر امریکی حکومت سے معلوم ہوا ہے کہ ایک نیا سفری پابندی کا حکم آئندہ ہفتے کے اندر نافذ کیا جا سکتا ہے جس سے تقریباً دو لاکھ افغان شہری متاژر ہونگے جنہیں امریکہ میں آبادکاری کی منظوری مل چکی ہے یا ان کی مہاجرین اور اسپیشل امیگرنٹ ویزا کی درخواستیں زیر التوا ہیں، یہ افراد افغانستان اور تقریباً 90 دیگر ممالک میں پھنسے ہوئے ہیں، جن میں تقریباً 20 ہزار افراد پاکستان میں موجود ہیں، 20 جنوری سے جب ٹرمپ نے مہاجرین کے داخلے اور ان کی پروازوں کے لئے دی جانے والی امریکی امداد پر 90 دن کی پابندی عائد کر دی۔